Politiet meldte tidlegare i dag om brann i M/S «Vendla» som ligg ved kai ved FMV. Brannvesen og politi kom på plass, men då hadde bedrifta sitt industribrannvern allereie sløkt brannen.

– Dei gjorde ein kjempegod jobb. Det kan elles lett bli dramatisk med skipsbrannar, seier brannsjef Tore Nesbø til fitjarposten.no.

Han fortel at det er snakk om ein mindre brann på eit avgrensa område. På grunn av varmgang hadde det teke fyr i nokre gummimatter som isolerte kompressorar / elektrisk anlegg.

– I tillegg var det ein ammoniakk-lekkasje som me måtte få stoppa. Men det har me no fått gjort, seier brannsjefen til slutt. 

Det var ingen personskadar i tilknyting til brannen. 

Godt var no det.

Elles er det trasige greier. Det er ikkje meir enn ei knapp veke sidan båten vart døypt under stor festivitas.