Kjekt å sjå på alle gruppene som viste fram litt av det dei held på med.

Turngruppa si juleoppvising i gymnastikksalen på Rimbareid skule onsdag ettermiddag var spekka av spreke nissar i ulike aldrar.

Turngruppa på Fitjar er svært aktiv og har 2 ulike turngrupper og to idrettsskule-grupper. I tillegg deltok friidrettsgruppa og karategruppa på den tradisjonelle juleoppvisinga, som vart leia av leiaren i turngruppa: Vibeke Strand Tranøy.

Ungane var spende, og langs veggane i gymnastikksalen var det stappfult av stolte slektningar som ville sjå sine håpefulle visa litt av det dei har halde på med denne hausten.

Foreldre og barn- gruppa som vert leia av Trude Strand, Bente Fitjar, Stine H. Koløen og Marit Engesund, starta oppvisinga med ulike songleikar.

Vidare overtok Sigrid Skram, Mariann T. Midtsæter, Gunn Evy Henriksen, Elisabeth Livastøl og May-Helen Korsvik som leier turngruppa for dei som er 4-6 år. Dette er ei stor gruppe med over 40 ungar, og dei har og fått med seg to yngre leiarar: Lisa Volden og Malene Hjelmen. Ungane var ivrige då dei stilte opp til stafett. Det var mange ting som distraherte, så innsatsen var variabel, men gleda var stor.

Når ungane tek til på skulen kan dei gå på idrettsskule. Her er det ei eiga gruppe for dei i 1. klasse, og denne vert leia av Jorunn Gjøen og Dan Torbjørnsen. Dei viste og ein stafett i tillegg til ein underhaldande dra-konkurranse, der det eine laget vann overlegent og synte stor vinnarglede.

Idrettskulen for 2. og 3. klasse vart leia gjennom ei aktivitetsløypa av Wenche Jensen, Else Marie Kristiansen og Armelyn Mehammer. Dei hoppa og rulla, og hadde det travelt gjennom løypa. Mindre populært var det at dei måtte stå litt i kø før dei ulike aktivitetane, men sikkerheiten er viktig og ein må venta på tur.

Ved Øvrebygda skule er det ei stor og aktiv Karate-gruppa med heile 50 medlemmer. Gruppa vert leia av Sukwinder Koløen og dei var med som gjester med ei flott oppvising av litt av det dei held på med.

Friidrettsgruppa, som held til i idrettshallen om vinteren og i idrettsparken om våren og hausten, er for dei som går i 4. klasse eller er eldre. Bård Inge Bøe, Tom Rydland og Rolf Vik hadde med Turid Marie Fitjar til å leia denne gruppa gjennom ulike øvingar. Dei entra salen frå scenen med faklar og sprelske hopp, og avslutta med å visa reaksjonstrening.

Publikum langs veggane storkoste seg gjennom heile den flotte oppvisinga. For mange av ungane kom høgdepunktet til slutt: besøk av nissen. Nissen kom, og han var ikkje åleina. Han hadde fleire nissejenter og nissegutar med seg, og alle hadde sekkar med godteposar i som dei delte ut til alle ungane, som så kunne gå glade og stolte heim og nyta litt søtsaker til avsluttinga av Jul i Svingen denne kvelden.

No tek turngruppa juleferie. Oppstart etter jul vert i veke 2, dvs frå mandag 11. januar.

Kjekt å sjå på alle gruppene som viste fram litt av det dei held på med.
Veeeeldig kjekt med nissebesøk!
Veeeeldig kjekt med nissebesøk!

Takksame foreldre ynskjer å takka alle dei dyktige og kjekke leiarane som står på for ungane veke etter veke !