Rundt 120 var til stades då fitjarposten var innom dei årlege fellesmøta på Øvrebygda skule i går kveld. Halvard Hasseløy talte på ein måte som alle kan forstå.

For folkeleg er han, denne forkynnaren som òg driv eit stort hjelpearbeid i Ukraina. Temaet han talte over i går, handla om at den åndelege verda er verkeleg. Han fortalde fleire historier som understreka det.

Mellom anna om Ludmilla, ei av medarbeidarane hans i arbeidet i Ukraina. Ho og dottera på fire år var på veg for å ta bussen då ein bil stoppa ved sida av dei. Ein mann og ei dame tvinga dei inn i bilen, og Ludmilla skjønte av det dei sa at dette var svært alvorleg. Dette var folk som dreiv med organdonasjon, og dei ville bli drepne for at dei skulle kunne selja organa deira.

I sin naud ropte Ludmilla til Gud, og brått stod det ein ukrainsk politimann i vegen og stoppa bilen. Han nemnde namna på Ludmilla og dottera, fekk dei ut av bilen og kommanderte dei som hadde kidnappa dei til å forsvinne. Vidare stoppa han ein drosje og bad drosjesjåføren om å køyre dei til busstasjonen, sidan dei skulle besøkja mor til Ludmilla (utan at ho hadde sagt noko som gjorde at han kunne vita det). Så forsvann han like plutseleg som han var komen.

Ludmilla var ikkje i tvil om at ho hadde fått englehjelp, og priste Gud.

Elles var det vakker og velsigna song av Willy Karlsen, og Marit Nilsine Tislevoll leia møtet på ein god måte.

Møta fortset i kveld og søndag, same tid og same stad.