Flott show under "Be our guest" frå Skjønnheten og udyret. Foto: Ingrid Hovstad

Fitjar musikklag og Fitjar skulekorps lova oss ein magisk kveld, og det leverte dei. Gjennom nesten to og ein halv time tok dei oss med på ei magisk reise gjennom Disney-universet.

Med 70 musikantar i alle aldrar leverte korpsa eit forrykande show. Dei serverte alt frå rolege slagarar, som «Beauty and the Beast» (frå filmen med same namn) til utruleg spenningsmusikk, med eit innslag frå filmen  «De utrolige». Her strålte Svein Arne Jordan Raunholm som solist på trompet.

Krabben Sebastian

Disney-klassikarar kom i fleng. Løvenes konge, Mary Poppins, Aladdin, Mulan med fleire. Dei serverte ogso nye klassikarar frå Frost og Moana, til stor entusiasme frå dei yngste i salen. At dei viste klipp frå filmane samtidig fall ogso godt i smak. Ein annan publikumshit blant både små og store var Ole R. Rørvik utkledd som Sebastian frå Den lille havfruen.

Ole Rørvik som krabben Sebastian. Foto: Ingrid Hovstad

Frysningsframkallande

Fitjar skulekorps er heldige og kan plukka mange talentfulle solistar i frå eigne rekker. Jakob Mehammer leverte på varene på blant anna «Be our guest», der korpset hadde flott danseshow til. Ingeborg Prestbø serverte oss kjærleiksongen «I won’t say» frå Herkules. Ole R. Rørvik trykte til på «Life is a Highway» frå Biler, der dei hadde sett saman eit flott husband med musikarar frå både korpset og musikklaget attåt. Thea Træet sin versjon av «Colors of the wind» frå Pocahontas, gav nok dei fleste i publikum frysningar.

Flott solist framføring frå Thea Træet. Guro Rimmereid på tangentar. Foto: Ingrid Hovstad

Verdt å få med seg

Publikumet vart leia gjennom showet av to stødige konferansierar, Terje Træet og Sissel Kristin Jørgensen. Dei leverte fleire humoristiske innslag, som når Terje Træet kom rullande inn på «eit flygande teppe», til mykje lått frå salen.

Elles må mykje ros gå til dirigent, Svein Roger Koppang. Det han får fram i desse to korpsa er heilt utruleg.

Konserten vart avslutta med ståande applaus frå ein neste fullsatt kultursal.

Gjekk du glipp av konserten i kveld? Slapp av, du får sjansen i morgon kveld ogso!

Morosame konferansierar. Foto: Ingrid Hovstad
- Annonse -