Godt fellesskap, mykje latter, alvorlege ord til oppmuntring og ettertanke og mykje flott song og musikk samla nærare 200 stykke til Kyrkjelyden sin årsfest på Fitjar bedehus søndag ettermiddag.

Trekkplaster på festen, i tillegg til eit rikhaldig kakebord, var hovudtalar Henrik Syse, som kom direkte frå karneval og søndagsskule i Fagerborg kyrkje i Oslo, med Harry Potter slips og flanellograf til festen på Fitjar. Medan ungane fekk sjå Jarle-film på loftet snakka Syse om «Noe å tro på», på ein humoristisk og lettfatteleg måte, men med fleire alvorlege poeng under vegs. Den raude tråden var Bibelen, Jesus, god tid og at det viktigaste er tru, håp og kjærleik.

Programmet inneheldt fleire gode musikalske innslag som greip festlyden. Delar av familien Oma framførde nydeleg firstemt song, og Osternes mannskor framførde to flotte songar av Tomas Kleppe frå Engesund. Ei ung musikargruppe under leiing av Lovise Vestbøstad hadde ei nydeleg framføring av You raise me up. Med Andreas Vik på trommer, Nils Birger Vestbøstad på bassgitar, Silje Rydland på vokal og sist men ikkje minst Vegard Aarbø på baryton vart det ei gripande framføring som me bar med oss vidare ut i snøføyka etterpå.

Folk i Fitjar er ikkje berre glade i å lytta til musikk, dei er og stort sett svært flinke allsongarar. Akkompagnert av Lovise Vestbøstad på piano trengde dei mektige fellessongane seg inn i hjarta og ut av huset.

Kaffi, tid til drøs, tid til herjing på gangen for dei som likar det og eit overdådig kakebord gjorde festen komplett. Me må heller ikkje gløyma Harald Johan Sandvik si framifrå framføring av teksten Samøtet av Harald Vik.

Kyrkjelyden sin årsfest var ein del av Bibelveka som soknerådet står som arrangør av. Oversikt over dei resterande arrangementa i Bibelveka finn ein på kalenderen her på fitjarposten.no.

Klikk på bileta for å sjå dei større.