Ein sprek gjeng, før dei har teke til med merketakinga...

Odd Larsen AS arrangerte idrettsmerketaking for sine ansatte i idrettsparken i dag. Mange møtte opp, og både form og humør var på topp.

Oppmøtet var overveldande  med 30 påmelde, i tillegg til nokre andre som hang seg på. Det heile var Sonja Pedersen sin ide. Ho hadde sjølv bestemt seg for å ta idrettsmerke og med Landaleikane i tankane kom ho på ideen om å ta det saman med dei andre tilsette hos Larsen. Odd Sverre Larsen som er dagleg leiar i Odd Larsen AS tende på ideen, og no er dei i gong. Odd Sverre ynskte idrettsungdomen i alle aldrar velkomen. Dei hadde fått hjelp av Øyvind Skålevik og Rolf Vik i idrettslaget med organiseringa av merketakinga, og Rolf og Øyvind tok ansvar for kvar si gruppe. Alle skulle gjennom ei øving i spenst, ei i styrke og ei i hurtigheit. Uthaldstesten har dei fleste teke tidlegare, og dei som ikkje har det må ta den ein anna dag. Innan kvar ferdigheit er det mange ulike måtar å oppnå kravet på, og det er og varierande krav etter alder.

Så er det ut på banen. Det er kaldt, bitande kaldt, men opplett. I Klubbhuset er det godt og varmt, og der finn ein påfyll av energi i form av frukt og drikke. Rolf og Øyvind må i tillegg til å vera domarar og visa dei ulike øvingane. For mange er dette heilt nytt, og dei treng hjelp og rettleiing. «Følg med jenter», seier ei myndig Laila Vesbøstad,» dette seier Rolf berre ein gong!»  Men det kan tenkast at han måtte forklara fleire gonger, og uansett får alle så mange forsøk dei vil. Alle viser stor framgang frå forsøk til forsøk.

Det er mykje lott og løye og gode oppmuntringar. » Yessss! Eg klarde da!» runga ofte over banen, saman med andre kommentarar: «Da va her du sku gjera da». » Ja, du er 2cm over, den er god.» «Da va jenta si det, kasta 6,20 med kula». » Pass deg no, Rolf!» Kula landa på 5.59, og Rolf stod på 5,58… «Kanon!»  «Så flinke du e!» «Du verden!» «Du har da inne!» «Glimrande!».

Nokre opplever at det er vanskeleg å kasta kula, og set seg ned og tek sitt-ups i staden. Mot slutten står Sonja klar ved starten på 60-meteren. Nokre er utolmodige og vil koma igang, men Sonja ber dei om venta på alle. «De e ditte så e da løgna», forklarer ho. Vanskeleg å forstå, men når ein står ved målområdet erfarer ein kva ho meiner. Alle, i alle fall alle damene, passer måstreken leande. Kva dei ler av er uvisst, men over målstreken kjem dei med humøret på topp.» Her på 60-meteren er det to ting  hugsa på», minner Rolf om: «De må helda banen dåkas og så må de halda farten heilt fram til tala.» «Hjelp, skal me heilt fram dit», utbryt ei av damene. Herrane står meir avslappa lenger bak, dei har kontroll på dette.  Det er og ein av gutane som plasserer bedriftsrekorden på 60 meter på 7,7. Rekorden vart satt av  Jan Ove Kjærland.

Rolf har sett fleire friidrettstalent denne ettermiddagen, og det er spesielt eit par gutar han gjerne vil hanka inn til friidrettstreninga på tirsdag.

Mørket sig på, og etter eit par timar gjev dei seg for dagen. Sonja meiner dei fleste har klard merke og gler seg over det.  Ho synes Larsen-leikane har vore fantastisk kjekke, spesielt når det kom så mange folk. Dette gav meirsmak, og både Sonja og Odd Sverre vil gjerne utfordra andre bedrifter og til å gjera det same, f.eks. Engvik og Tislevoll.

Idrettsmerke-handboka kan lesast her: http://www.idrett.no/ftp/PDF/H%C3%A5ndbok%20for%20idrettsmerket.pdf

Ein sprek gjeng, før dei har teke til med merketakinga…