Sola har smilt til sveitte fotballfolk frå Fitjar i Danmark, men berre gutane i 13-årsklassen vann i dag.

Dermed blir det berre Jenter 14 som representerer Fitjar Idrettslag i A-sluttspelet i Dana Cup i år. Dei skal møta Estudiantes Querétaro frå México i 16-delsfinalen i morgon.

Trass i avansement gjekk 14-årsjentene på tap i dag, 0-3 mot puljevinnar Enskede SK frå Sverige. Også Gutar 16 og Gutar 17 tapte kampane sine i dag. For juniorane har det blitt tre jamne kampar mot tre gode lag; med litt meir marginar på si side kunne det blitt poeng. I dag blei det eit knepent tap 1-2 mot mexicanske Grupo Sherwood.

Det einaste Fitjar-laget som vann ein kamp i dag, var 13-åringane i guteklassen. På føremiddagen møtte dei Tollnes Ballklubb frå Skien, og vann så klart som 3-0. Fitjar-gutane var klart betre enn telemarkingane, og det var heilt fortent at dei kunne innkassera sigeren etter fine scoringar av Andreas Vik, Arild F. Waage og Markus Tislevoll.

I den andre kampen sin i dag blei 13-åringane eit lite hakk for små. Motstandarane Spiel- und Sportverrein Stadtlohn kjem frå ein mykje større klubb enn Fitjar, men måtte slita hardt mot godt kjempande fitjarbuar. Det stod 1-1 heilt til slutten av kampen, og eit uheldig sjølvmål avgjorde kampen til tyskarane sin fordel.

Sportsleg har altså ikkje marginane vore heilt på fitjarfolket si side, men sosialt og når det gjeld veret, har me så absolutt hatt marginane med oss. I kveld ladar folk som vanleg opp til ein ny dag med grilling og bading på den endelause stranda rett utanfor stovevindauga.