Jens Kloster, den raskaste o-løparen i Fitjar. Foto: FP-arkiv/KR.

Jens Øien Kloster har vore i Østfold og sprunge to norgescupløp under VM-veka, og kom eit godt stykke bak dei beste i dei skogkledde o-løypene.

Fredag var var det fellesstart, og vår mann enda heilt sist, på 74-plass. Med tida 01.41,13 var han 46,25 minutt bak vinnaren Viktor Svensk, frå Stora Tuna OK, Borlänge i Sverige.

Jens fortel til Fitjarposten at han raskt bestemte seg for å ta eit ope vegval rundt litt skog, og ikkje gjennom. Han kom inn til første post like bak feltet, men han fann ikkje posten. Sjølv meiner Jens at posten låg feil, eller at detaljen posten ligg på, ikkje burde blitt brukt til post.

Det skulle ha vore eit høgdepunkt som han ikkje såg då han nærma seg. Dermed blei han gåande rundt posten utan å sjå noko til den eller høgdepunktet. Han fann posten til slutt, men meiner den låg i eit søkk og ikkje på eit høgdepunkt. Her tapte Jens mykje tid, som han ikkje greidde å ta igjen utover i løpet.

Mellomdistansen på tysdag gjekk o-teknisk bra, fortel Jens. Men han er enno ikkje heilt i den fysiske forma han vil og bør vera. Han greidde likevel å halda hovudet kaldt der dei fleste andre bomma, og slik sett er han fornøgd med tysdagens løp. Han enda på 17.35 minutt bak vinnaren Vegard Kittilsen frå Freidig.

Resultatlistene frå Norgescup-løpa i Østfold finn du via denne linken til Eventor. Gå inn på resuktat frå Delarrangementer heilt nede, og WOC2019 – Norgescup Jr.

Vår beste mann i o-løypa fortel elles om god stemning på arenaen, etter at dei norske deltakarane har hatt eit godt VM, spesielt herrane. Som kjent har Olav Lundanes vunne tre VM-gull i Østfold denne veka.

Jens legg til at sesongen slett ikkje er over for hans del. Seinare i haust skal han til Verdal for å springa NM, og vil prøva å koma i betre form til då.