Det er lenge til valkampen startar, var det fleire som sa då Fitjar KrF hadde stilt seg opp i sentrum.

Parasoll med logo på gjorde KrF godt synleg utanfor Odd Larsen AS. Leiar Johannes Nesse og ordførar Harald Rydland var på plass for å få folk i tale. Nysteikte vaflar og kaffe var det mange som takka ja til. Og med ein kaffekopp i handa kom praten i gang. Dei delte ut ei brosjyre med tittel Kva er viktig for deg? På denne var det plass til notater og høve for innlevering for dei som ville seia si meining til partiet. På ei av sidene kunne ein lesa noko av det KrF er opptatt av: Verdig alderdom, barns rettar, familievenleg kvardag, miljøvenleg energi, nestekjærleik, gode lokale helsetilbod…

Den store mengda av handlande fitjarbuarar var ikkje i sentrum denne føremiddagen, men det var mange tilreisande som slo av ein prat. Det såg ut som folk kosa seg i sommarvarmen.

KrF stand no i juni er ein landsomfattande aksjon.