Etter 3-2 mot Frøya i ein dramatisk kamp tysdag kveld er det klart at damene er kretsmeister i fotball 2008.

Fitjar sitt damelag reiste til Bergen for å spela siste og avgjerande  kretskamp mot Frøya tysdag kveld. Utgangspunktet var så enkelt at med uavgjort eller seier var laget kretsmester i Hordaland 1. divisjon 7 er.

Med sterk vind og sludd var det i periodar vanskelege forhold for godt pasningsspel. Fitjar-damene opna nervøst og det var tydeleg at mykje sto på spel. Laget fekk likevel den første store sjansen når Britt Lise Volden kom aleine mot keeper, men skuddet gjekk dessverre på feil sida av stolpen.
Etter 8 minutt løsner Frøya skudd frå distanse som «stussar» i eit Fitjar-bein og laget tar ledelsen 1 – 0. Det går ikkje mange minutt før Fitjar utliknar til 1 – 1, Birte Steinsland knallar ballen opp i nett-taket etter godt førearbeid av Gro Hatlevik og Anne Helene Vestbøstad. Omgangen forset med eit lite overtak av Fitjar-damene, men 10 min. før pause tek Frøya igjen ledelsen etter ein fin enkeltmanns-prestasjon.

Det er eit veldig tent Fitjar-lag som går på banen for andre omgang, laget tar tak i spelet frå start av, men avslutningane går som regel til side for, eller over mål. Fitjar må minst ha eit mål til for og bli meister, men Frøya er heller ikkje ufarlege på kontringar. Kvarteret før slutt får endeleg Fitjar belønning for eit spelemessig overtak, når Anne Helene Vestbøstad får klokkereint treff på ballen frå
15 meter, og laget er i det øyeblikket kretsmester.

Gro Hatlevik feiar all tvil til side når ho set inn ein keeper-retur og gir laget 3 – 2 seieren rett før slutt.
Laget har dermed vunne begge sine kampar mot dei to andre puljevinnarane i Hordaland og er kretsmester i 2008!

Stein Gunnar Halleråker vil nytta anledninga til å takka alle spelarane som har vore med og bidratt både på trening og i kamp i sesongen 2008!