Kjøpmenna i Fitjar melder om tiltak i frukt/grønt-avdelinga. Arkivfoto: Kjetil Rydland/ Ingrid Hovstad

Fitjar kommune lurer på korleis Spar og Rema 1000 handterer frukt/grønt-avdelingane under Koronapandemien.

Spørsmålet kjem som ein del av arbeidet med smittevern i kommunen.

– Me vil henta inn kunnskap om korleis matvarebutikkane på Fitjar håndterer frukt/grønt-avdelingane under denne Koronapandemien, og om det er sett inn konkrete tiltak, skriv rådmann Olaug Haugen i eit brev til dei to lokale matvarebutikkane.

Pakkar i butikk

Butikksjef Odd Sverre Larsen på Spar svarar at dei har sett i gang to tiltak.

– Me har stengt salatbaren, og produkt som er klare til å eta, utan skall og som vanlegvis vert seldt uinnpakka som epler, pærer og tomater, vert no pakka i butikk.

Ogso Rema 1000 har gjort noko liknande, og kjøpmann Jan Stian Taule skriv at dei har vridd salet frå lausvekt til ferdig pakka produkt frå produsent.

– Me har innført hyppigare handvask på tilsette som jobbar med frukt, samt auka frekvensen med reinhald i denne avdelinga. Elles har me informasjon til kundane om personleg hygiene og tiltak godt synleg, og deler ut eingongshanskar ved inngangen, samt desinfeksjonsstasjon.

Taule skriv at dei har stoppa med smaksprøva og auka fokuset på posepakking i butikk.