Fitjar-gutane måtte reisa poenglause heim frå att Bergen fredag kveld, etter tap 1-2 for Baune.

Spelemessig var kveldens kamp eit tilbakeskritt etter den sterke kampen mot Follese førre helg. Spesielt førsteomgangen var skuffande frå Fitjar-spelarane si side. Då florerte dei halsbrekkande tversoverpasningane, og aggressive Baune-spelarar kom til store sjansar.

Til Fitjar-gutane sitt forsvar må nemnast at dei møtte eit hardt kjempande heimelag, som sprang mykje, og ofte var først på ballen. Dermed braut dei opp Fitjar sitt spel, og sørgde for at gjestene ikkje fekk til mykje offensivt spel. Men dei to måla som heimelaget fekk, kom som resultat av feil i Fitjar-forsvaret.

Rundt midten av første omgang spelte dei seg fint gjennom på høgresida, etter at Fitjar-forsvaret hadde «selt seg» i trekket før, og det harde innlegget frå høgresida sette Glenn Kristoffersen sikkert i mål. Rett etterpå kunne det blitt 2-0, men i staden kontra Fitjar. Roger Almås spela framover til Jan Åge Tislevoll, som pressa Baune-forsvaret til å gjera feil. Ballen skifta retning og gjekk inn bak ein utrusande Baune-keeper. Ei heldig utlikning på sjølvmål.

Men lukka smilte ikkje lenge til Fitjar-gutane på det våte kunstgraset ved Brann Stadion denne sure haustvelden. Berre eit par minutt seinare var det duka for ein ny feil i Fitjar-forsvaret. Raske Tord Morken sprang frå alle og scora frå skrå vinkel. Baune heldt oppe trøkket utover i første omgang, og kunne lett ha scora fleire mål. Så Fitjar var nok heldig som slapp med 1-2 til pause, sjølv om Thomas V. Waage hadde eit godt forsøk frå 16-meteren. Men den gode Baune-keeperen Marius Pedersen var heilt nede ved stolperota og henta ballen.

Etter pause var det tydelegvis slutt på kreftene for heimelaget, og Fitjar hadde det meste som var av spel og sjansar. Mats Brakedal kom inn eit kvarter ut i andre omgang, og la press på Baune-forsvaret med fleire fine raid. Det same gjorde banens beste spelar, Badi Hurasi, på høgresida til Fitjar. Men medspelarane hans var ikkje flinke å ta vare på dei fine pasningane hans inn framfor mål.

Sjølv om Fitjar dominerte totalt på slutten av kampen, klarte heimespelarane å ri av stormen. Først og fremst takka vere ein god keeper, som henta fram fleire matchvinnarredningar. Spesielt beinparaden på skot frå femmeren i sluttminutta var imponerande. Men det er som kjent lov å ha god keeper, og dermed kunne Baune innkassera tre litt heldige poeng, mot eit Fitjar-lag som tapte på ein skuffande førsteomgang.

Etter kveldens tap begynner haustmørkret å senka seg over Fitjar. Med sine 22 poeng kan dei snart bli passerte av Djerv på tabellen for 4. divisjon, og med tap for Bremnes om to veker kan også dei gå forbi. Så no bør Fitjar vinna både mot Djerv heime neste helg og mot Bremnes om to veker.

Det er såleis ein litt skuffa Kjell Træet som måtte venda tomhendt heim fredag kveld. – Dette var den enklaste av dei tre kampane mot lag rundt oss på tabellen, så no blir det tøft, seier han til Fitjarposten.

Ingressbilete: Badi Hurasi, banens beste i kampen mot Baune. Foto: Kjetil Rydland.

steroide kaufen