Politiet fekk i ettermiddag kl. 15.30 melding om at det hadde vore ein kjedekollisjon ved bomstasjonen på Føyno med fleire bilar involvert.

Det synte seg at ein utanlandsk turist i Autopass-feltet plutseleg hadde flytta seg over til betalingsfeltet slik at bilane som kom bak fekk problem med å stansa.

-Det var den fjerde bilen i rekkja som køyrte inn i den nest bakarste, og bilane hadde så forflytta seg inn i dei foran. Det var ingen personskade – berre materielle skadar. To av bilane måtte tauast av bilbergingsselskap. Dei to andre køyrde bort for eigen maskin, opplyser operasjonsleiar Svein Sørensen ved Haugaland og Sunnhordland politidistrikt.