Viktor på 8 år har akkurat tatt saga i handa for å lage ei julegåve, kanskje til mormor.

Me er på besøk på Øvrebygda skule der elevar, lærarar og nokre foreldre er i full gang med juleverkstad. Me går først inn i sløydsalen. Ei aldersblanda gruppe på 10 – 12 elevar teiknar mønster til ei skjerefjøl, og Viktor er ein av dei som alt er klar til å sage. Arbeidet går med liv og lyst, ser det ut til.

I eit klasserom sit elevflokken musestille og lyttar når læraren les om skomakar Andersen. Etter ein julesong får elevane forklart korleis ein lagar englar på ei kleklype, og så er det full aktivitet.

I eit anna klasserom er det høve til  å lage julekort når alle har dekorert kvar sin kopp. Dei teiknar motiv med porselenstusj. Så skal koppen tørke i 24 timar og til slutt steikast i omnen i 90 min. Dette må jo også bli ei lagleg julegåve, tenkjer me.

Den gruppa som held til i gymsalen, høyrer me på lang veg, naturlegvis, for der er det musikk og m.a. kamp om å halde ut til slutt i stolleiken. Denne aktiviteten er eit godt avbrekk når ein elles er med på andre økter med stillesitjande oppgåver.

Lukten av nysteikte kakemenn fører oss inn på skulekjøkkenet. Det er visst ingen som blir lei av å lage kakemenn, sjølv om dei fleste har vore med på baking heime og. Otto Pedersen, far til Martine som nettopp har trykt ut mange kaker, seier at dette er like gøy kvart år. Han har visst vore medhjelpar kvart år sidan eldstemann i 7. kl begynte på skulen. Ungane kjevlar og får hjelp viss deigen set seg fast, og ein av dei vaksne set fulle kakebrett i steikeomnen.

Elevane er flinke til å høyre etter når det blir forklart korleis dei kan lage fine lykter. Tomme syltetøyglas blir pensla med lim før dei blir rulla i glitter. Fargerike perler blir tredd inn på tynn ståltråd, og denne skal festast som hank. Vips, så er lykta ferdig. Heime kan ein med hjelp frå vaksne setje i eit telys og få fint skin frå lykta. Kven får ei slik gåve i år?