Det blei ein kald natt for ivrige 4H-arar som overnatta i Rydlandsskogen natt til laurdag.

Det var to vaksne og seks ungar som tok utfordringa frå 4H og markerte 4H-dagen 4. mai på denne kjølige måten. 4H-arar frå Hordaland fylke og over heile landet har sove ute i natt under mottoet Under open himmel. På denne måten ønskte 4H å setja uoffisiell noregsrekord i å sova ute. Alle klubbane som deltar er med i trekninga av friluftsutstyr til ein verdi av kr 5000. Målet er at 4H-arane skal ha det morosomt og sosialt ute i naturen, og skal me dømma etter stemninga fredag kveld, blei målet nådd.

4H-arane i Øvrebygda 4H bestemte seg for å sova ved Stebmetjødno rett nord for Rydlandssago. Her har seniorar frå Stord Fitjar Turlag sett opp gapahuk, som eldstemann i 4H-flokken overnatta i. Dei unge 4H-arane la seg i telt rett ved sida av. Dei møttest klokka 19 fredag kveld; det møtte 13 4H-arar. Nokre prøvde seg på litt hesteskokasting, men kanopadlinga var nok kveldens høgdepunktet. Det er ein solid tradisjon i Øvrebygda 4H. Litt utpå kvelden spidda dei pølser, karbonadar, pinnebrød og marshmallows over bålpanna. Og heilt til slutt kokte dei kakao på bålet.

Kl. 23 gjekk dei som ikkje skulle sova ute, heim. Seks tøffe 4H-arar – og to vaksne – overnatta i telt og lavvo. – Det gjekk veldig fint, men nokre sov litt lite på grunn av kulde, fortel Ida Marlen Havn, som kom med frukost laurdag morgon klokka 9, og hjelpte til å pakka saman innimellom sluddbyene.