Denne blide gjengen førebur julemarknad på Helland. Foto: Kjetil Rydland.

Reidun Ahrens Helland og ektemannen Arnt skipar til ein heilt ny julemarknad i Litla-Ola-tunet på Helland 1. desember.

Plantene i det nye gartneriet på Helland har teke «vinterferie», men det har så visst ikkje Reidun og Arnt Ahrens Helland. Dei inviterer til stemningsfull julemarknad i tunet sitt laurdag 1. desember.

Stemning i tunet

Dei lovar god stemning med noko for alle sansar, med levande julemusikk, kortreist mat og handlaga julegåver.

– Me ynskjer å skapa lun, gamaldags og nostalgisk jul på LitlaOla-tunet, der ein kan senka skuldrene og berre nyta den gode julestemningen, seier Reidun Ahrens Helland.

Dei har fått med ei rekkje lokale samarbeidspartnarar, som er godt i gang med å førebu julemarknaden saman med vertskapet.

Julemat og julegåver

Margareth Tislevoll, Oddvar de Fine og Sverre Sæterbø stiller med varer frå Fitjar Gardsmat.
– Det blir høve til å kjøpa juleribba her! smiler Reidun.

Frå Hogste gardsmat kjem Tone Koløen med heimelaga leverpostei og brunost. Synne Aarbø skal selja tråd. Hilde Volden de Fine skal selja produkt frå mohairgeiter. Johannes Koløen sel heimelaga knivar, og Irene Torvund strikkaprodukta sine. Solveig Thomassen steikjer lappar og sel raunebærgelé. Og Nina Aarbø Olsen kjem med kunsten sin.

Sjølv vil Reidun Ahrens Helland ha julebutikk i drivhuset med ymse handlaga produkt. Ho vil selja gammaldagse julekuler av glas, gravkransar og økologiske, svenske velværeprodukt med godlukt.

Det blir sal av bakst og gløgg og kakao. Frelsesarmeen vil vera på plass med gryta si, og det blir aktivitetar for ungane i garasjen.

Levande musikk!

Reidun lovar også mykje god musikk. Fitjar Skulekorps kjem og drar det heile i gang med juletonar klokka 12. Litt seinare kjem Årstein Tislevoll, og etter kvart vil òg Harald Rydland dukka opp med trekkspelet sitt. Som avslutning på dagen vil ei gruppe med avgangselevar frå Kongshaug vidaregåande skule halda julekonsert.

– Eg er overbevist om at det kjem til å bli eit stemningsfullt arrangement, og ei fin innleiing til adventstida, seier Reidun Ahrens Helland. Det er ingen grunn til at ho ikkje skal få rett. Kryss av 1. desember på kalenderen!

Me håpar det blir like fint som i kveld, seier Reidun Ahrens der ho sit ved bålpanna ute i tunet. Foto: Kjetil Rydland.