Men kom Knut, og kvar kom i tilfelle Knut frå? På Rimbareid var det eit jamt sig med kjekke, flotte og flinke julebukkar heile ettermiddagen og kvelden på trettande dagen. Så godt som alle song, og sjølv om mange framførde «På låven sitter nissen med sin julegrøt», var det likevel stor variasjon i repertoaret, og nokre imponerte med fleire julevers. Høflege var dei og, dei både takka, bukka og neia då dei fekk noko godt i posane sine.

Men så var det denne 13. dags Knut som skulle jaga jula ut, som me skreiv om 6. januar, kom han? Nokon har retta oss og sagt at sjølv om ein kastar jula ut 13. dag jul, så høyrer Knut til 20. dag jul, og at det heiter Tjuandedags-Knut jagar jula ut.

6. januar, som var juledagen etter den julianske kalenderen som me brukte før me skifta til den gregorianske på 1700-talet, vert kalla trettande dagen (trettandedag jul) eller heilage tre kongars dag. Dagen etter, 7. januar er St Knuts dag. Knut var hertug i Danmark på 1100-talet og vart drepen av fetteren sin Magnus den 7. januar i 1131. Det vert sagt at med det slutta jula og julefreden opphøyrde. Den heilage Knut Lavard vert betrakta som martyr og skytshelgen. Ei veke seinare møter me ein ny Knut. Denne heilage Knut sin dag har vore 13. januar, altså tjuandedag jul, den same dagen som var nyttårsdagen i den gamle kalenderen. Knut levde på 1000-talet, var son av danske kong Sven og var ein from mann. Han vart Danmark sin første martyr, og vert i dag kalla Heilage Knut av Danmark. Knut vart drepen medan han knelte framfor alteret i St. Albanis kyrkje i Odense i Danmark 10. juli 1080, og denne datoen er minnedagen hans i dag. Tidlegare var St Knut sin minnedag 13. januar. 

Vil du veta meir om kalenderen, juledagane og dei ulike Knutane finn ein uendeleg med stoff om dette både i leksikon og på internett.

Eg gler eg meg til neste gong me får julebukk-besøk og er spent på kva kreativ måte dei har kledd seg ut på då og kva julesongar dei kjem til å syngja. Men mykje skal skje før den tid og no ventar eg først på at ein eller annan Knut skal koma å jaga jula ut…

 

Heilagetrekongarslys på trettandedagen.