Stian Torland i spissen for laget med Lars, Torunn og Daniel Halleraker. Og Jorunn Torland er fint med midt i feltet. Foto: Kjetil Rydland.

Laurdag føremiddag fekk me eit kort møte med Team Rynkeby, då Stian og Jorunn Torland følgde bømlafamilien Halleraker frå Sandvikvåg til Bømlo.

Dei tre syklistane frå Bømlo – Lars, Torunn og Daniel Halleraker – har sykla i to veker, på den lange ferda Noreg på langs frå Nordkapp til Lindesnes. Då Stian Torland kom frå Nordkapp på den same turen i fjor, blei han møtt av Lars og Torunn Halleraker i Oppdal, og dei sykla saman heile vegen ned til Lindesnes.

Gir kvarandre draghjelp

– Det var kjekt få høve til å gjera litt gjengjeld, seier Stian i dag, etter at han har vore med og gitt dei litt draghjelp i to dagar, frå Førde i Sunnfjord og til Bømlo, der familien Halleraker bur.

I dag kom dei fem syklistane til Sandvikvåg i 12-tida. Både Stian og mammo – Jorunn Torland – hjelpte dei tre bømlingane å halda farten gjennom Fitjar og Stord ut til Bømlo. Og som om ikkje det var nok, stilte dei to «maskinane» Ole Magne Rydland og Roger Nesbø opp i Årskog, og drog Team Rynkeby-syklistane gjennom Fitjar og over Morkjo, heilt til Nora Dyvikereset.

Trondheim i år – og Paris til neste år?

No reknar Stian med at mammo har fått ein god start på sommarens sykkeleventyr med Team Rynkeby. Fredag om knapt ei veke skal Jorunn Torland leggja ut på langtur til Trondheim, saman med rundt 30 andre syklistar. Først blir det eit arrangement på Torget i Haugesund, der dei vil fortelja publikum om prosjektet.

Fredag ettermiddag går turen til Etne, og så syklar dei vidare til Eidfjord, over Hardangervidda til Geilo, til Beitostølen, Geiranger, Trollstigen og Molde, før dei til slutt endar i Trondheim. Både Stian og mamma Jorunn blir med heile vegen, og på ettermiddagen laurdag 17. juli vil alle dei ni norske Team Rynkeby-laga – rundt 300 syklistar – møtast i Trondheim.

Eigentleg skulle «Team Rynkeby» sykla heilt ned til Paris, slik dei har gjort i mange år, men både i fjor og i år har denne turen blitt avlyst på grunn av covid-19-pandemien. Men Stian avslører at mammo har ein draum om å sykla til Paris – kanskje draumen vil gå i oppfylling for Jorunn Torland til neste år?

Familien Halleraker kviler ikkje lenge på laurbæra på Bømlo. Allereie i morgon syklar dei vidare mot Lindesnes. Der vil dei snu og sykla tilbake til Haugesund, og førstkommande fredag slår dei følgje med Jorunn og Stian Torland på langturen mot Trondheim!

Støtte til kampen mot kreft blant barn

Målet med prosjektet er å oppleva fin natur samtidig som dei samlar inn så mange pengar som mogleg til Barnekreftforeningen og forsking på barnekreft.

– Me ønsker å bidra til å redusera talet på barn som døyr av kreft, og omfanget av seinskader etter kreftbehandling, seier Stian Torland, som legg til at Team Rynkeby er eit fint sosialt tiltak.

På Nore Dyvikereset vinkar Team Rynkeby farvel, og takkar «maskinane» Ole Magne Rydland og Roger Nesbø for draghjelp. Foto: Kjetil Rydland.

Historia til Team Rynkeby

Ideen om å sykla til Paris dukka opp for 20 år sidan, då ein medarbeidar i Rynkeby Foods i Danmark, Knud Vilstrup, hadde fått konstatert røykelunger. Han ville gjera noko for å bli litt sunnare samtidig som han fekk ei oppleving.

Han foreslo å sykla til Paris for å sjå innspurten i Toru de France på Champs-Élysées, og spurte teknisk direktør i Rynkeby, Torben Møller-Larsen, om han kunne sponsa litt juice til turen. Det gjekk Torben Møller-Larsen med på mot at han sjølv fekk bli med på turen.

Team Rynkeby – God Morgon blei ikkje stifa som eit velgjerdsprosjekt, men då syklistane kom tilbake frå den første turen i 2002, hadde dei eit overskot på 42 000 NOK, som dei bestemte seg for å donera til barnekreftavdelinga ved universitetssjukehuset i Odense.

Knud Vilstrup overtalte den administrerende direktøren for Rynkeby Foods, Jørgen Dirksen, til å investera penger i prosjektet på nytt, og dette blei starten på velgjerdsprosjektet som eksisterer i dag. Talet på deltakarar og sponsorar og deltakarar veks år for år, og det same gjer donasjonane til dei organisasjonane som Team Rynkeby støttar.

Kjelde: Heimesida til Team Rynkeby.