Johannes Sandvik Bø på toppen av sigerspallen i Leikvanghallen mellom nr. 2 Mathias Skrede Kallmyr og Sigurd Olav Langhelle. Foto: Privat.

Under Pingvinleikane i Åsane i dag stod Johannes Sandvik Bø for den beste Fitjar-prestasjonen då han vann 1500 meter i suveren stil.

Med tida 4.37, 88 var Johannes nesten 32 sekund føre nummer to i det ni mann store feltet, Mathias Skrede Kallmyr frå Bjarg IL. Nummer tre blei Sigurd Olav Langhelle Myksvoll frå Bergens TF, eit godt stykke bak der igjen.

Vinnartida til Johannes var pers med 16 sekund, så det er tydeleg at den lettbeinte fjortenåringen vår fortset framgangen. Ein annan framgangsrik fitjarungdom er Marius Pedersen, som blei nummer to i høgde. Resultatet 1,50 er ny pers, og med det hoppa han like høgt som dagens vinnar i øvinga.

Halvor Aga (15) persa med 11 sekund på 1500 meter med 4.42, trass ein liten stopp ein runde før mål på grunn av litt kluss med rundeanvisninga. Bjart Sandvik Bø (13) persa også på 200 meter med tida 34,04, som heldt til ein 11.-plass. Johannes Sandvik Bø nytta også høvet til å setja pers på 200 meter, der han blei nummer fire, med tida 27,40.

I morgon skal Marius springa 600 meter og hoppa lengde. Tori og Olve Torbjørnsen deltek også.