Denne veka har me blitt velsigna med nokre ugløymande haustdagar, og ein av dei heldigaste er den glade harejegeren Rune Aarbø.

Han kunne ikkje ha vore heldigare med avspaseringsdagane sine, skriv han i ei melding der han sender oss flotte bilete frå fjellet. Rune fortel om spanande jakt med godt resultat. Onsdag laut to harepusar lata livet på Sæterbøfjellet.

Dagen etter gjekk turen til Smalahaugane, grovt rekna mellom Årbø og Klovskarfjellet. Jakthunden Toya tok snart ut ein hare som var mykje heldigare enn dei to på Sæterbøfjellet. Rune fekk haren på fem meters hald, men denne gongen let han hagla liggja. I staden tok han fram mobiltelefonen og filma den lettbeinte krabaten. Videoen kan du sjå på nettstaden til Aarbø og Helland’s jaktlag.

I dag var ikkje vêret like strålande, men Rune tok igjen turen til Sæterbøfjellet, saman med jaktkameratane Håvard Helland og Terje Andreassen. Her fekk Rune gleda av å skyta den tredje haren sin i haust, medan Håvard måtte nøya seg med nærkontakt med ein hjort. Heldigvis for hjorten hadde ikkje karane verken hjorteløyve eller rifle. Så hjorten slapp med skrekken då Håvard reiste seg og brølte til han på to meters avstand! Hjorten skal visst ha fått seg litt av eit sjokk, snubla og sprang rett i eit tre, før han kom seg vekk.

Etter det me forstår er det god stemning i jaktlaget for tida. Men hundeeigar Håvard Helland er litt misunneleg på kompisen Rune Aarbø, som har skote dei fleste harane.

– No får ikkje Rune låna hunden meir! seier Håvard i ein kort kommentar til Fitjarposten.

Ingressfoto: Stemningsbilete frå Sæterbøfjellet onsdag denne veka. Foto: Rune Aarbø.