Kultursjef Bente Bjelland med Andrea og Per Magnus Grøsvik frå Stord. Foto: Kjetil Rydland.

Fitjarbuar frå fjern og nær møttest til ein drøs og variert mat frå all verdas kantar i Varehuset Larsen i dag.

I «tarmen» mellom Spar-butikken og Larsen Multihandel var det knapt råd å fota seg i føremiddag. Så stor var interessa blant fitjarbuar frå ulike verdsdelar til å møtast og smaka på mat frå sju ulike land.

Dette er jo nesten som på Grønland, smiler Bent Jarle Brenne, som har fått tak i ein syrisk rett med paprika og kål. Foto: Kjetil Rydland.

I dag kunne me nyta smaksprøvar frå sju ulike land på årets internasjonale dag i Fitjar. Rettar frå Peru, Venezuela, Mexico, Syria, Malaysia og Ungarn var på menyen, i tillegg til god, gammaldags blomkålsuppe frå Noreg!

Dei fleste kokkane kjem langvegs frå og sette pris på å la oss få smaka rettar som høyrer heime i dei opphavlege heimlanda deira. Og til mange rettar følgde det med oppskrifter.

Ellinor Bergesen ved Fitjar Frivilligsentral fortel at dei har arbeidd lenge med planlegginga av denne gastronomiske stormønstringa. I år er sjuande gongen dei har skipa til ein slik dag i Fitjar, etter oppstarten i 2012. Spar-butikken sponsar råvarene til dagens rettar. Maten skal i størst mogleg grad kunna lagast av det du finn i butikken, men enkelte ingrediensar har kome heilt frå Tyskland. Dette har Bente Bjelland ved kulturkontoret vore med og sponsa.

Leiaren ved Frivilligsentralen gler seg over å få nytta eit slikt høve til å løfta fram folk slik at me kan bli kjende med dei.

– Dei er små diamantar, heile gjengen! seier ho og smiler.

Til liks med Ellinor Bergesen er kultursjef Bente Bjelland godt fornøgd med oppmøtet. Ho lovar at den årlege innbyggjarfesten vil bli arrangert igjen til neste år. Men festen som var planlagt i morgon, søndag, måtte dessverre avlysast.