Ingve André Strand førebur seg til ein ny sesong i crosskarten sin. Foto: Kjetil Rydland.

På Søre Stølen bur ein mann som er minst like rask som påskeharen, og han kan i tillegg rosa seg med tittelen norsk meister i idretten sin.

I rundt 20 år har Ingve André Strand hevda seg i noregstoppen i crosskart, og vunne både enkeltløp og NM samanlagt. Og veteranen frå Fitjar, som alt i alt har vore den jamnaste og beste av alle i heile landet i denne idretten, har på ingen måte tenkt å leggja opp.

I år er det fem år sidan Ingve André Strand vann NM samanlagt, og då trappa han litt ned. Han overlét førsteførarposisjonen i Strand Motorsport til son sin, Anders Halleråker Strand. Men i år har ikkje junior høve til å satsa for fullt, og det blir berre far som skal køyra konkurranse i år.

Som enkelte kanskje hugsar, hadde Ingve fleire gode plasseringar i fjor, sjølv om han ikkje satsa like hardt som tidlegare. Og i NM-runden på Rallebanen i Bø gjekk han heilt til topps. Etter den prestasjonen lova Ingve å gjera det store i år, men det er ikkje lenger ambisjonen, slår han fast i ein påskeprat med Fitjarposten.

– Det blir mest for gøy, seier Ingve André, eg tar det som eit pluss om resultata kjem!

Han slår fast at utstyret er minst like bra som før. Det heile vil nok stå på føraren, trur han. Og i dag reiser den rutinerte crosskartføraren til Birkeland for å «pussa rattrust» på Ruglandsbanen like nordaust for Kristiansand sentrum. Her skipar Kristiansand Automobilklubb Vårcrossen, både for bilcross, rallycross og crosskart i morgon.

Det er viktig å få med dette løpet, sjølv om det ikkje tel i samandraget. Det er nemleg her den første NM-runden går av stabelen, 25.–26. mai, og Ingve har lyst til å gjera seg kjend med banen. Laurdag 4. mai blir det nytt «testløp», denne gongen på heimebane i Vikedal. Dette er òg viktig å få med seg, etter som den andre NM-runden blir arrangert her 9. juni.

– Det er gunstig å få med to testløp før dei to første NM-rundane, slår Ingve André fast.

Han satsar på å få med alle rundane i årets NM, men ønskjer å dempa forventningane på førehand. Verken ambisjonar eller støtteapparat var heilt på plass då me feira påske, og han vil ta det som det kjem.

Men kjenner me den lynkjappe påskeharen rett, vil han satsa alt på å leggja gamle kjenningar bak seg på banen, når han først står på startstreken …