Her kjem Ingve André Strand (697) til kort mot ungdommen Bjørn Cato Aarekol i Vikedal. Foto: NMK Vikedal.

Laurdag sesongdebuterte Ingve André Strand med å bli nummer to i crosskart i Vikedal, bak den unge klubbkameraten Bjørn Cato Aarekol.

Påskeharen frå Søre Stølen kom seg ikkje til Birkeland på Sørlandet for to veker sidan, då han ikkje blei heilt ferdig med å skifta girkasse på den store «firmabilen» til Strand Motorsport. Dermed kom han ikkje i gang med å «pussa rattrust» før under laurdagens løp i Vikedal.

Den tidlegare norgesmeisteren frå Fitjar fekk sterk konkurranse på heimebanen, der den første NM-runden skal gå av stabelen 1. pinsedag, 9. juni. Då er heile norgeseliten i crosskart venta til Vikedal, med rundt 70 crosskartar.

Sonen Anders Halleråker Strand har teke pause i år, og Atle Nordpoli Teigland frå Osterøy hadde lånt crosskarten hans. Men den sterkaste konkurransen kom frå ein som er endå meir på heimebane i Vikedal, nemleg ungdommen Bjørn Cato Aarekol.

På sin eigen 17-årsdag fekk Bjørn Cato Aarekol ei strålande sesongopning ved å vinna både bilcross junior og crosskart 650 ccm, den største klassen, der Ingve André køyrer. Vår mann måtte nøya seg med andreplassen, føre Daniel Svarstad, KNA Aust-Agder.

– Det er godt mulig at han som slo meg i Vikedal i helga, blir NM-meister i år, seier Ingve André Strand til Fitjarposten i dag.

Han er verken sint eller hemnlysten etter nederlaget, forsikrar Ingve André.

– Nei, dette tar eg med knusande ro, seier han til Fitjarposten, det er berre kjekt med unge og svoltne sjåførar på veg fram!

For sin eigen del ser han lyst på det. Dette var første testen i år, og køyringa kom seg utover dagen, etter kvart som han fekk justert litt på «ting og tang», som han seier.

No vonar han å vera fit for fight til den første NM-runden, som går av stabelen på Ruglandsbanen like nordaust for Kristiansand sentrum.

Den som lever fram til 26. mai, vil få sjå om Ingve klarer å halda ungdommen bak seg når alvoret startar. Me kryssar fingrane.