Stillige kostymer i festivaltoget! Foto: Ingrid Hovstad

Nok ein gong tok handballfeberen over øya, og for 30.gong var det klart for handballfestivalen på Stord. Heile 435 lag er i aksjon, 5 av desse i frå Fitjar.

Allereie før festivaltoget og den offisielle opninga fann stad, var Jenter13 i aksjon mot Stord 3. Fitjar såg ut til å sova i første omgang, og forsvaret slapp Stordjentene forbi. Men etter pausen kvikna J13 til, og forsvaret stoppa alle som måtte prøva seg. Spenninga bygger seg opp, men når Stord 3 får straffe mot slutten av kampen ender det med tap til Fitjar 7-8.

Jenter13 møtte seinare på dagen Sund, ein kamp som enda med tap 13-8.

Jentene prøver å stoppa eit skot i frå Sund Foto: Ingrid Hovstad

Sjølvsagt kom regnet

Til tross for gode meldingar byrja det tidleg å dryppa i frå himmelen. Regnet såg ikkje ut til å legga ein dempar på stemninga i toget, der alle laga fekk sjansen til å visa seg fram. Fitjarlaga deltok sjølvsagt, og dei minste hadde kledd seg ut som emojiar. Dei eldste gjekk for fin bodskap, og hadde skrive «ver deg sjølv, du er god nok» på t-skjortene sine.

Cecilie Leganger, kulturminister Trine Skei Grande og ordførar Gaute Straume Epland leia festivaltoget. Foto: Ingrid Hovstad

Idrettsglede

Dei minste frå Fitjar IL J7 og J8 stod for god stemning og mange mål i regnveret. Akkurat kva stillinga vart er uvisst, med dei minste tel ein ikkje mål, og ein har heller ikkje sluttspel. Her er det idrettsgleda som står i fokus, og glede var det ingen mangel av blant desse laga. Jubelen satt laust, og jentene var flinke til å rosa lagvenninnene sine sjølv om ballen ikkje nødvendigvis gjekk i mål.

J8 var blide om dei scora eller ikkje. Foto: Ingrid Hovstad

Idrettsglede var det ogso mykje av når gullserien møttest til kamp. Stord United møtte Kolsnes, med den legendariske handballkeeperen Cecilie Leganger som dommar. Fleire Fitjarfolk var å sjå på  laget Stord United, og blant anna Mathias Larsen imponerte. Han redda ball etter ball som keeper i andre omgang. Journalisten må innrømma at ho gløymde å ta bilete under kampen, for ho var opptatt med å jubla saman med resten av publikum i salen til stades under kampen.

Jenter 7 i aksjon. Foto: Ingrid Hovstad

Tøffe motstandarar

Jenter15 fekk ein tøff start på dagen, då dei møtte knallsterke Åkra til kamp. Åkra køyrte på med sterke angrep, og med dårlege pasningar i frå Fitjar stal dei enkelt ballen og scora på kontringar. Oda Volden de Fine kjempa hardt i mål, men forsvaret klarte ikkje stoppa dei raske Åkrajentene. Kampen enda 22-3 til Åkra.

Ogso Søreide vart for sterke, som vann 25-10 over J15.

Jenter 12 her i aksjon mot Kvinnherad. Foto: Ingrid Hovstad
- Annonse -

Jenter 12 stod derimot for dagens einaste siger til Fitjar. Dei vann 14-7 over Bjørnar 2. Jentene kjempa ogso tappert mot Kvinnherad 1, men måtte sjå seg tapt 8-6.

Morgondagen

I morgon vert det meir glede med J8, og nye harde kampar for J12, J13 og J15. Ikkje la regnet stoppa deg frå å heia på jentene våre. Eller som ei av jentene på 15års laget sa «bollane dei sel her, er i seg sjølv verdt turen».