Henrik Åmot Helland på seks år finn seg godt til rette bak rattet. Foto: Kjetil Rydland.

– Kor er alle ungdommane hen? lurte Paul Veaas då han gjesta Helland CNC i Fitjar søndag middag, og måtte innsjå at dei ikkje stod i kø for å prøvekøyra den flotte kassabilen hans.

Kjekt med kassabil, synest Emma Dahl Steien på seks år. Foto: Kjetil Rydland.

Venaas vonar å vekkja gode minne hos vaksne som har erfaring, og så frøet til ei ny interesse hos den yngre garde, men det var ikkje så mange som nytta høvet då den blide sløydlæraren kom til Fitjar i går.

Prøveturen frå Leirvik til Fitjar gjekk rimeleg bra for olabilentusasten, sjølv om han sleit med å koma fram til avtalt tid. Då Venaas nærma seg Levåg, nærma klokka seg faretrugande 13, og han måtte tilkalla Stian Helland for å bli henta. Men det var ikkje noka krise, for det var ikkje akkurat kø av ventande då dei kom fram til Helland CNC ved besinstasjonen.

Venaas fortel at han hadde visse tekniske problem etter søndagens opne dag på Vabakkjen. Circle K-bilen fekk ein liten skade, og derfor måtte han bruka ein NAF-bil på turen til Fitjar. Han valde E39 på austsida av øya, sjølv om den ruta er litt lengre enn vestsida. Men det er meir fotgjengarfelt på austsida.

Om det var få entusiastar som venta, ble det desto kjekkare for dei få småtassane som fekk rikeleg tid til å køyra rundt på plassen ved Rema 1000 og Helland CNC i den vesle NAF-kassabilen.

I morgon legg Paul Venaas ut på den 700 kilometer lange «signingsferda» til Oslo via Sørlandet. Første kvelden reknar han med å overnatta i Haugesund, etter å ha gått over Bømlo til Langevåg, og teke ferja til Buavåg i Sveio. Neste dag er planen å gå til Skudeneshavn.

Dagstappane blir om lag som dagens tur frå Leirvik til Fitjar. Såleis var gårsdagens marsj på seks timar ein realistisk prøvetur. Paul Venaas fortel at han starta dagen allereie klokka halv seks søndag morgon, og han kom seg av garde i sjutida.

Veaas begynner med å overnatta i telt, men det kan henda at han «feigar ut» etter kvart. Han har nemleg høve til å få med følgjebil. Medeigaren i firmaet hans disponerer nemleg bubil. Men først vil Paul sjå om han klarer seg utan hjelp.

– Først vil eg prøva å ha det skikkeleg ubehageleg, og så får me sjå etter kvart! smiler han.

Etter dagens framsyning på Fitjar er kanske Venaas litt skeptisk med tanke på kor stor interessa for prosjektet han blir. Men slett ikkje knekt! Han vonar å få 100 førehandstingingar før han kjem fram til Oslo. Og no legg han trøstig i veg, og vil ta kontakt med lokalaviser og andre på vegen, og er framleis optimist!

Me ønskjer god tur!

Torleif Solli vil ikkje byta ut sykkelen med ein olabil, og Paul Venaas ser litt skuffa ut. Foto: Kjetil Rydland.