Trott slo botnlaget Kjøkkelvik 3-0 i kveldens seriekamp i Prestagardsskogen.

Dei som hadde håpt på hjelp frå botnlaget Kjøkkelvik i kveldens kamp mot Trott, måtte kjøra skuffa heim att til Fitjar. Trott tok tidleg leiinga på eit litt billig straffespark ved Øystein Hillestad, etter at Christopher Steensohn hadde blitt hindra inne i Kjøkkelvik-feltet. Etter denne scoringa kontrollerte Trott første omgang, og kunne lett ha scora fleire mål. Men med 1-0 ebba første omgang ut.

Om Trott hadde vist mykje fint spel før pausen, såg me lite til dette i andre omgang. Dei sleppte seg nedpå, og botnlaget Kjøkkelvik kom meir med i kampen. Men midt i omgangen fekk Trott eit nytt straffespark. Denne gongen av det klinkande klare slaget, og Kjøkkelvik-forsvararen var heldig som slapp det raude kortet. Øystein Hillestad var igjen sikker eksekutør, og dermed var kampen avgjort.

I slutttminuttane laga ein Kjøkkelvik-forsvarar sjølvmål, slik at sigeren til Trott blei så klar som 3-0. Alt i alt ein velfortent siger, sjølv om Trott ikkje skremte nokon i andre omgang. Bortsett frå dommar Karl Inge Nymark frå Bjoa, som nok ein gong klarte å hissa på seg spelarar frå begge lag med underlege dommaravgjersler.

Med denne sigeren legg Trott press på Fitjar i kampen om andreplassen i 5. divisjon avd. 03. Dei er no oppe på 30 poeng, fire poeng før Fitjar på tredjeplassen. Dermed bør Fitjar vinna søndagens bortekamp mot Os 2 for ikkje å bli hengande for langt etter.