Ingve André Strand hadde tekniske problem, og lukkast ikkje heilt under NM-runden i crosskart på Lyngåsbanen sist helg.

Ingve André Strand kom seg til A-finalen under årets første NM-runde i crosskart, men sjetteplass er litt bak målsetjinga. Han starta helga med to andreplassar i innleiande heat, men i det tredje heatet måtte han bryta. Han fekk problem med motoren, og måtte skifta motor før finalen.

Frå sjette startspor kom han seg ikkje opp i teten, og måtte sjå gamle kjenningar som Simen Vardeberg, Rolf Arne Gulliksen og Ludvik Einarsen kjempa om dei fremste plassane. Men ingen av dei klarte å tukta ein annan gammal kjenning; Jack Fjelstad stakk av med sin første siger i ein NM-runde.

Med sjetteplass i finalen kopierte Ingve prestasjonen frå første runde i NM i fjor, men det er litt bak målsetjinga i år. No er teamet litt skuffa over at tekniske problem har gjort sesongstarten tyngre enn venta. I Sverige svikta støtdemparane, og denne gongen var det altså motoren, som er send til motorbyggjaren for ny service. Tilretteleggjar og pressetalsmann Sigurd André Maraas seier det er fortvilande når utstyret sviktar slik utan forvarsel. Ingve slit og med startane, men det kan skuldast justeringa av støtdemparane. Tilretteleggjaren legg ikkje skjul på at det er ei økonomisk utfordring med to motorhavari og tre defekte støtdemparar på under ein månad. Men han reknar med at det vil løysa seg, slik at NEZ – North European Championship –  ikkje står i fare.

No håper dei at uturen er over, og at dei når nye høgder i NM-runden på Finnskogbanen i Solør 22. juni. Dette er ein bane der Ingve vanlegvis gjer det godt. Dette løpet er første rundet i årets NEZ-cup og såleis eit svært viktig løp for Ingve.

Midt oppe i den trøblete sesongstarten for Ingve, har det vore oppmuntrande å sjå at sonen viser fin framgang. På Lyngåsbanen blei Anders H. Strand nummer fem i B-finalen etter at han måtte bryta andre innleiingsheat etter krasj, snurr og full stans.