Søndag klokka fire starta det tredje året på rad med «Fitjar got talent». Det var mykje nerver, og mange som ville sjå når unge talent mellom barnetrinnet og opp til vidaregåande frå heile Sunnhordland, viste fram det dei hadde øvd på.

Over 500 tilskodarar, tre dommarar, rundt tjue deltakarar og ein kjendis, skulle gjera ettermiddagen i Idrettshallen i Fitjar kultur- og Idrettsbygg heilt spesiell.

Showet starta med at Ole Bergensen introduserte domarpanelet som skulle velje ein vinnar i kvar klasse. A-klassen var barneskulen, B-klassen var ungdomsskulen og C-klassen var vidaregåande opp til tjue år.

Dei første deltakarane var «Kari Fitjar and the dancing girls», og dei starta showet med eit smell. Mykje bra dans og variert musikk prega starten på kvelden, som for eksempel Tirill Einarsdottir som song «Chasing Pavements», heilt fantastisk.

Det var óg eit gjensyn med Jan Anders Presthus som deltok for andre gong i år med ein humoristisk og bra gjennomført stepping til «money money» av ABBA. Mange brukte stemma si til å prøva å imponera publikum, og ni av fjorten innslag var song.

Ein som ikkje song var Fridar Malmsten Steinkopf. Han brukte diablo, sjongleringspinnar og rockering med eit fartsfylt lydspor i bakgrunnen når han gjorde dei utrulegaste triks med utstyret sitt. Det var godt å ha litt variasjon i programmet og ikkje berre song og dans.

Etter at Ingvild Oma hadde avslutta songen «Come home» var konkurransen ferdig, og domarpanelet sette seg saman og diskuterte kven som vann i kvar klasse.

Men før vinnarane skulle bli annonsert, inntok kveldens kjendis, Tone Damli Aaberge scena og publikum samla seg tett rundt den spreke tjuefireåringen. Ho song til dei (til tider) hylande tilskodarane, som meinte ho burde vunne konkurransen då ho spurde kven dei heia på. Ho ga alle som kom for å sjå på ein fantastisk avslutning på ein allereie flott kveld.

Då Tone var midt i showet spurde ho: – Er det mange traktorar her? Publikum nikka og Damli sa: – Da føler eg meg heima her – og med eit smil forsette ho å synge. Etter Tone var ferdig skulle vinnarane annonserast, og Damli las sjølv opp dei heldige vinnarane.

I klasse A var det Fridar Malmsten Steinkopf som tok sigeren med den fantastiske sjongleringa. Jørgen Bauge vann klasse B med songen «Himmelen faller ned», og i klasse C var det Åshild Røssland som drog det lengste strået og vann den siste pengesjekken.

Tone fekk også med seg premie heim, såpe frå Fitjar såpekokeri.

Heilt til slutt var det signaturskriving med Tone Damli Aaberge og køen var nesten for lang for Tone som skulle nå ei ferje.

Alt i alt var det ein underhaldande kveld, og det tykkjer Sigvald Leirvik og deltakar Ingvild Oma også. Nivået var høgt, og eg forventar å sjå mange av talenta gjera det bra i framtida òg.