Marius Torbjørnsen gjekk over 1,69 i første forsøk på Jessheim.

Marius Torbjørnsen er tilbake etter å ha delteke i årets Ungdomsmeisterskap i friidrett på Jessheim, og fredagens fjerdeplass i høgde blei beste prestasjonen hans.

Han reiste saman med Stord Friidrett og fekk med seg tre øvingar i klassen G16, høgde på fredag, tresteg på laurdag og lengde i går.

Fredagens 4.-plass i høgde G16 blei den beste plasseringa til Marius. Han gjekk fint over 1.65 og 1.69 i første forsøk, men på 1,74 reiv han tre gonger. Tredjeplassen til Marius rauk då Simon Cruz Fjeldstad gjekk over 1,74 i siste forsøk, så det er små marginar. Vinnar blei Abraham Sandvin Vogelsang på 1,80, føre Christian Andre Thomassen på 1,74.

Tidleg laurdag morgon blei det 8.-plass i tresteg. Her var Marius eit stykke bak persen sin, på ein kald og hustrig bane. Søndag morgon deltok Marius i lengde, som eigentleg berre var for ei bonusøving å rekna. Her blei det 11.-plass med 5,33 meter.

Sjølv om Marius ikkje kom heilt opp på maksnivået sitt, har han alt i alt hatt ei god helg, med matching mot dei beste 16-åringane i Noreg. Og til neste år får han vonleg med seg ein annan Marius frå Fitjar, ein ungdom med Pedersen til etternamn.

Fleire opplysningar og resultat frå årets Ungdomsmeisterskap på Jessheim finn du på heimesida til Ullensaker/Kisa IL friidrett.