I mai har den lokale bridgetoppen vår, Roger Træet, hevda seg i blant dei beste i fleire store turneringar.

Kristi himmelfartsdag, 14. mai, deltok han i Maibridgen på Rubbestadneset. Han var einaste deltakar frå Fitjar, og reiste med båt i det fine vêret.

Her hevda han seg i toppen av det beste feltet som nokon gong har vore samla på Vestlandet. Då det stod att tre rundar, var Roger heilt oppe på tredjeplassen, saman med makker Frode Tveito. Han datt ned på 8.-plassen til slutt, men seier seg likevel svært godt fornøgd med prestasjonen.

Feltet denne gongen var mykje hardare enn då han vann i Bekkjarvik for nokre veker sidan. Stavanger-paret Paul Bang og Jan Fjælberg vann ein suveren siger. Resultatlista blei prega av par frå Stavanger og Bergen, og saman med makker Tveito utgjorde Roger det beste paret frå Haugaland krets.

Dette var nok ikkje tilfeldig, for to veker seinare gjekk Roger heilt til topps i kretsmeisterskapet for lag. Det gjekk av stabelen søndag 31. mai i Nordhuset rett utanfor Haugesund, med dei fire beste laga frå Haugaland krets på plass. Saman med Stig Gamlemshaug, Øyvind Haga og eksilfitjarbuen Tore Bårdsen vann Roger ein suveren siger.

Roger nyttar høvet til å minna om dei framleis spelar bridge på Øvrebygda skule på torsdagskveldane. Dei har eit par bridgekveldar igjen før sommarferien, og han oppmodar interesserte om å ta kontakt. Han tilbyr hjelp for dei som ønskjer å begynna å spela bridge. Til hausten blir det igjen bridge på Øvrebygda skule.