Hestehoven på Rydland ser ut til å ha stått i blomst nokre dagar. Foto: Kjetil Rydland.

Den milde vinteren gjer at enkelte blomar er mykje tidlegare enn normalt, og hestehoven i vegkanten ved Gamle Sæterbøvegen har stått i blomst ei stund allereie.

Me skreiv om denne hestehoven for eitt år sidan, og slo fast at det var ein aldri så liten sensasjon at hestehoven blømde i februar. Denne påstanden må me nok eta i oss igjen – blømande hestehov i februar er nok i ferd med å bli regelen snarare enn unntaket.

Vanlegvis blomstrar hestehoven i perioden mars–mai. Hos oss har det vore vaneg å møta den første blomsten ein gong i mars, alt etter «vêr- og føreforhold». I år har han allereie stått i blomst nokre dagar, og det i god tid før me skriv mars.

Hestehoven er ikkje den einaste planten som blømer uvanleg tidleg i år. Om du vil sjå andre blomar som er litt «ute av rute», kan du gå til Facebook-sida til Sunnhordland Botaniske Forening.

Hestehoven har mange namn, blant anna leirfivel og følfod (dansk), og på latin har han det velklingande namnet tussilago farfara. Han er ein gammal medisinplante; blada inneheld slim som lindra hoste og fekk sår til å gro. Dette vil me nok ikkje anbefala i dag. Blada har òg blitt brukte som tobakk og til fargeplanting.