Stian Myklebust Helland byrjar å verta nøgd med utstyrsparken sin. Foto: Ingrid Hovstad

Satsar meir på heilfolering av bilar.

Stian Myklebust Helland sitt enkeltpersonføretaket Helland CNC  går over til å vera aksjeselskap.

– Vel eigentleg so har eg fortsatt enkeltpersonføretaket Helland CNC, men eg hadde eit anna selskap DUS-T AS som eg gjorde om til Helland CNC AS. DUS-T var eit selskap eg hadde som selte ein spesiell type t-skjorter, men det tok aldri heilt av, småler Stian M. Helland.

Den teknikkinteresserte Helland starta selskapet som ein hobby, og er sjølvlært i gravering, skilting og profilering. Med pippi-innstillinga «det har eg aldri prøvd før, so det klarer eg heilt sikkert» går den litt maskinegale Helland laus på oppdraga som dei kjem.

Flatbed-printer, lasergraveringsmaskin, foliekuttar, automatisk varmepressa, med meir. I verkstaden er det mange store leiketøy. Det nyaste tilskotet ein ny CNC fres, som kan fungera opp mot printer.

– Det vert stadig nye maskinar. Eg har lyst på ein printer til, eg får plass til ein der borte, fortel Helland medan han peikar.

Er ikkje ein liten sak den nye CNC fresen. Foto: Ingrid Hovstad

Profesjonell foliemontør

I tillegg til å gå frå ENK til AS har Stian Myklebust Helland tilsett Domantas Stankevičius. Han er profesjonell solfilm/foliemontør.

– Han har montert solfilm på over 6000 bilar hittil i karrieren, og er sertifisert montør av coverstyl, ein type folie ein kan nytta på interiør, fortel Helland.

- Annonse -

Helland skryt mykje over Domantas Stankevičius, og fortel at han er dyktig på alt av folie.

– Her kan me nok nytta oss av den strategiske plasseringa rett ved bilverkstad for å få oss kundar, fortel Helland medan me ser Domantas Stankevičius legg folie på ein bil.

Domantas Stankevičius i aksjon. Foto: Ingrid Hovstad

Stian Helland er utdanna automatikar og arbeider fortsatt offshoreturnus, som serviceingeniør. Når han er vekke jobbar ofte broren Even Helland for han, saman med dei to tilsette Domantas Stankevičius og Sarunas Kaskevicius.

– Eg er elles veldig heldig som kan leiga inn Karen Karn, som driv Karen Karn design, når eg trenger hjelp til grafiske utfordringar. Å utforma det grafiske har eg ikkje alltid tid til, så då er det utruleg greit å leiga ho til dette. Då er det enkle jobben att til meg å produsera, ler Helland.

Når me kjem på besøk er det Fitjarfestivalplakatar som vert printa. Foto: Ingrid Hovstad

Folk må sjå moglegheitene

Omsetninga stig jamt og trutt, og aukande oppdragsmengde var ein av grunnane til at Stian M. Helland no kunne ta steget til aksjeselskap.

– Eg har enno ikkje fått ei krone i overskot. Alt eg har tent har gått i å investera i utstyr. Eg håpar jo at investeringa i denne store utstyrsparken kan gje overskot ein dag, men då må fleire oppdaga meg, og sjå kva som er mogleg å få til med utstyret eg har her, fortel Helland.

Han kan garantera rask levering, og god kvalitet.

– Me har heldigvis ikkje gjort nokre store feil enno, og godt er det. Stiller ein til dømes inn høgden feil på skrivaren så kan i verste fall printerhovuda ryke i det. Nye kostar rundt 30.000 pr. stk og med 10 stk. so dobbeltsjekkar me heller, småler Helland.