Handballgruppa i FIL arrangerer handballskule for alle born i alderen 7-12 år, to dagar, i vinterferien.  Både dei som har spelt, og dei som ikkje har spelt handball før, er invitert til å delta.

Dette er første gongen Handballgruppa set i gong ein slik aktivitet.  Påmeldingane sig på, så det ser lovande ut.  Handballskulen skal vera tirsdag og onsdag i vinterferien (19-20. februar), og me held på frå ti til to begge dagane.  Påmelding for å vera med er tirsdag 6. februar.  Anne Sissel (47413375) og Jan Kåre Mehammer (40403202) tek i mot påmelding. 

 

Det kostar berre 200 kr. for å vera med desse dagane, og me vonar at folk synest det er ein ok pris for eit godt tiltak i ferien. Mange av spelarane på dei eldste laga skal vera instruktørar, saman med Berit Siglen som er trenar for Damelaget (5. div). 

 

Det vert lagt opp til mykje leik og moro, samt at skal me gjera handball-øvingar med og utan ball.  Har du ikkje spelt handball før, gjer det ingen ting.  Her er me for å ha det kjekt, og for å læra!

 Me legg opp til to økter, og skal ha skikkeleg lunsj i mellom desse.  Odd Sverre hos SPAR stiller opp med brød, pålegg, drikke,m.m, så ingen skal vera svoltne under samlinga. Eg tek med brødristaren.  Då me var på handballcup i Danmark i påsken nokre år, var alltid den med.  Skal sei det gjekk unna på brødskjevene då alle fekk nyrista brød!  Trur dei andre laga der var litt misunnlege på oss, då! 

Ellers vil eg oppfordra alle i Fitjar til å koma i hallen når det er handballkampar.  Me set opp plakatar utanfor SPAR før kampdag, og skal prøve å leggje inn på FIL si heimeside, og informere Fitjarposten om når desse dagane er. Sist  helg var det 4 kampar, og det var utruleg flott oppslutning om desse.  Det var nok på det meste mellom 120-170 stk i hallen den dagen. 

 

Ei ”gamal handballdame” på langt over 40, vert jo kjempenervøs av slikt, men du verden kor kjekt det var då dei jubla og heia oppå tribunen! 

 

Og er det fleire – både nye og gamle handballspelarar som vil vera med på laga våre, så er dei hjarteleg velkomne!  Ta kontakt med oss så får de vita treningstider. 

 

Neste store kampdag er søndag 10. februar, så då håper me på ein stor heiagjeng på tribunen.  Det kjem opp plakatar om tidspunkt.