Anita Haugland med fleire fine mål i første omgang, men ho blei litt borte etter kvart. Foto: Kjetil Rydland.

Handballdamene til Fitjar IL heldt godt følgje med NHHI 2 i vel ein omgang, men på slutten av kampen blei dei unge og lettbeinte handelshøgskulejentene for kjappe og vann så klart som 25-18.

Fitjar har teke plass nesten i botnen av tabellen i damenes 5. divisjon, og dei fekk ikkje noko løft i dag heller, endå NHHI stilte med berre sju spelarar frå toarlaget sitt.

Damene våre heldt godt følgje med gjestene heile første omgang, og laga gjekk til pause på stillinga 9-9. Andre omgang begynte også bra, og ti minutt ut i omgangen stod det 15-15. Men derfrå og inn tok gjestene fullstendig kontroll over kampen.

NHHI-keeperen tok det meste av det som kom forbi forsvaret hennar. Gjestene blei betre og betre organiserte, og det kan nok henda at dei fekk lettare spel av at heimelaget sine spelarar gjekk tomme for krefter.

På slutten av andre omgang var heimelaget sjanselause, og måtte sjå at gjestene var best i alt. Dei siste 20 minutta scora Fitjar berre tre mål, medan gjestene scora ti. Dermed blir Fitjar liggjande på nest siste plass i 5. divisjon avd. 01 med fire poeng.

På tribunen var det også denne gongen altfor lite folk, og dei som var der, gav ikkje lyd frå seg. Det er ganske kjekt å vera inne og sjå handball på ein vindfull søndag ettermiddag, men for å komma må folk må vita at det er kamp. Litt meir annonsering anten på sosiale medium eller andre stader hadde vel vore på sin plass?

Fitjar sitt lag mot Stord 2 (mål i parenes): Mariell Stølås (k), Martine Fredlund (3), Helene Rimmereid, Anita Haugland (3), Maria Grastveit Larsen (4), Cathrine Dyrdal (1),Julie Skjerve Jensen (2), Ingvild Rimmereid (2), Monica Våge Helland (3).

Innsats og rutine var ikkje nok for Monica Våge Helland, som scora tre mål mot NHHI 2. Foto: Kjetil Rydland.