Handballdamene frå Fitjar slo Mathopen, eit av botnlaga, med 28-22 på heimebane tysdag kveld.

Fitjar-damene vann ein klar og fortent siger over Mathopen, og ser ut til å funne sin plass midt på tabellen i 5. divisjon.

Heimelaget fekk tidleg ei leiing på to-tre mål over gjestene frå Bergen, og den gav dei ikkje frå seg. Ved pause stod det 16-11 til Fitjar, og dei heldt fram som dei slapp i andre omgang. Dei forsvarte leiinga utan synderlege problem, takka vera bra keeperspel av Kristine Korsvik, og brukbart angrepsspel.

Den einaste smule dramatikk kom godt ute i andre omgang då Mathopen sette frimerke både på Ingvild Rimmereid og Charlotte A. Levåg. Dette forpurra spelet til heimelaget, og gjestene klarte å redusera leiinga til tre mål. Men mot slutten fann Fitjar-damene igjen vegen til mål, og vann heilt fortent 28-22.

Best på Fitjar var Charlotte A. Levåg, som blei toppscorar med seks mål, det same som vingen Miriam Almås. Også Ingvild Rimmereid og Randi Thorland hadde brukbar utteljing, med fem mål kvar.

Fitjar sitt lag (scoringar i parentes): Lisa Folkedal (k), Kristine Korsik (k), Charlotte A. Levåg (6), Randi Thorland (5), Miriam Almås (6), Helene Rimmereid, Marita Nysæther (1), Lillian Gjuvsland (2), Julie Skjerve Jensen (3), Ingvild Rimmereid (5).