Nina Silden reduserer for Fitjar. Foto: Kjetil Rydland.

Handballdamene greidde nesten å ta att gjestene på slutten, men tapte til slutt 23-25 for BI under søndagens kamp i Fitjar kultur- og idrettsbygg.

Laurdag var Fitjar IL sine handballdamer i Bergen og sikra seg sesongens første poeng etter uavgjort 27-27 mot NHHH I.

I dag blei det ein ny jamn kamp for Trond Arnevik og damene hans. Gjestene frå BI skaffa seg tidleg ei leiing som dei aldri gav frå seg. På det meste var den oppe i fem mål, men midt i andre omgang var Fitjar i støtet, og tok skikkeleg innpå.

Då Fitjar gjekk opp til 19-20, såg det ut som om dei var i ferd med å snu kampen. Men dei unge jentene frå BI tok timeout, og greidde å riva til seg overtaket igjen, og drog akkurat nok frå til å sikra seg begge poenga.

Fitjarjentene spela ein bra kamp mot eit sterkt lag, men blei klart svekt av at Charlotte Ayoe Levåg måtte gå ut med ein lei skade.

Toppscorarar for Fitjar blei Renate Olsen og Ingvild Rimmereid, begge med fem mål.

Etter dagens tap ligg Fitjar nest sist i 5. divisjon kvinner 02 med det eine poenget dei kapra laurdag. Førstkomande laurdag ventar tredjelaget til Bjarg i Sandslihallen. Neste heimekamp er 3. november mot Askøy 2.

Renate Olsen blei toppscorar med fem mål. Foto: Kjetil Rydland.

Fitjar sitt lag (scoringar i parentes): Mariell Stølås (keeper), Helene Rimmereid (1), Maria Larsen (3), Emilie A. Hystad (3), Nina Silden (2), Oda de Fine Olsen, Charlotte A. Levåg, Ingvild Rimmereid (5), Renate Olsen (5), Monica V. Helland (4).

- Annonse -