F.v. Lisbeth T. Nesbø, Anne Helland Brakedal, Line Jensen Westvik og Malene Ahrens Halleråker kosar seg på hobbyhandball. Foto: Ingrid Hovstad

Kvar tysdag samlast ein gjeng damer til trening i idrettshallen på Fitjar. Her skal det spelast handball og ein skal ha det gøy.

Ved hjelp av facebook-gruppa «Fitjar Hobby Håndball» sjekkar dei kvar veke om det er nok folk til å arrangera trening. Treninga frå 20.00 til 21.30 har eksistert i nokre år, men framleis er det nok mange på Fitjar som ikkje veit om tilbodet. Dette er eit lågterskel tilbod for alle som syns handball er kjekt. Du treng berre innesko, treningskle og godt humør. Elles kan medisinteip vera lurt, ein får fort nokre blemmer dei første gongane ein spelar med klister, og det kan vera godt å kunne teipa ein finger eller to om det skulle skje.

-Før eg var med på mi første trening var eg nervøs. Utrent og utan særlege evner i handball var eg bekymra for kva dei andre skulle tenkja. Eg hadde ingenting å vera nervøs for, det er ein kjempe kjekke gjeng som trenar saman, fortel ei ny i gruppa.

Damene i aksjon. Foto: Ingrid Hovstad

Det er ingen tvil imellom medlemmane i gruppa om kvifor nye folk bør ta turen – det er kjekt!

-Her gjer det ikkje noko om det er 20 år sidan du tok i ein ball sist, eller om du har kondisjon som ein lungesjuk hamster, fortel Anne-Marie Stokken, som legg til at hovudpoenget hennar er at alle kan koma uansett nivå eller form.

-Fordi det er så vanvitig gøy! Og er man utenbys fra er det en fin måte å komme på hils med de innfødte, fortel Ingelil Handeland Eide. Ho får påstanden sin støtta av Frida Sunniva Aase.

Lisbeth T. Nesbø er primusmotor bak opplegget, og styrer treningane. Ho seier at alle som likar handball må berre melda seg inn i facebook-gruppa, og oppfordrar alle til å koma på ei trening og prøva.

Kristi Rydland i hopp mot Ingelill Handeland Eide i mål. Foto: Ingrid Hovstad
- Annonse -