Forlagssjef Håkon C. Hartvedt med to nye godbitar frå bokhylla. Foto: Kjetil Rydland.

Den tidlegare redaktøren i Fitjarposten, Håkon C. Hartvedt, har ikkje lege på latsida i haust, og i desse dagar kan han presentera nye bøker av Halvard Wiik og Bjarne Korsvik.

For ikkje lenge sidan lanserte han boka «Eg gjer meg aldri!» med Gunnar Ingebrigtsen. Me har også blitt kjende med fleire andre nye bøker tidlegare i haust.

Men dei aller siste bøkene på Fitjarposten forlag får ikkje publikum sjå før bokkvelden på Fitjar seniorsenter måndag kveld. Me har fått høve til å smugkikka i desse bøkene, og kan stadfesta at publikum har mykje å gle seg til.

For fire år sidan kom Bjarne Korsvik med «Minne frå ei svunnen tid», ei bok som fekk karakteristikken lokalhistorie på sitt beste. Det same kan me trygt seia om den nye boka frå 85-åringen som voks opp i Korsvik: «Dagen lir, det går mot kveld. Men minna lever.» I denne boka er Korsvik endå meir personleg enn i den førre boka si. Me får del i unike detaljar som ville gått i gløymeboka om ikkje Bjarne Korsvik hadde formidla dei til oss.

Den andre rykande ferske boka frå Fitjarposten forlag er skriven av Halvard Wiik. Her finn me dei fantastiske artiklane som Halvard tidlegare har fått trykt i «Sunnhordland», i tillegg til nokre nye. Boka er rikt illustrert av Lars Slettebø og Thomas Zipfel. Historiene som blei trykte «Sunnhordland» blei umåteleg populære, og den eine, «No kjem også eg ut av skåpet», tok heilt av etter at ho blei delt på Facebook og blei lesen av 80 000!

Det er altså all grunn til å tru at dei siste bøkene frå Fitjarposten forlag vil slå an, så her gjeld det å vera om seg. Dette må bli årets julegåver!

Forlagssjef Hartvedt fortel at Harald Johan Sandvik blir med på bokkvelden og les høgt frå desse to bøkene. Og sjølvsagt vil dei to forfattarane Halvard Wiik og Bjarne Korsvik vera med.

Boka til Halvard Wiik har blant anna denne fantastiske teikninga av Thomas Zipfel, en tysk avisteiknar. Foto: Kjetil Rydland.
- Annonse -