Etter ei spennande avslutning vann gutelaget 3-2 over Follese på grasbanen, Fitjar Idrettspark, torsdag kveld.

Det er tydelegvis ikkje enkelt å vera askøybu og spela fotball mot fitjargutane i år. For nokre veker sidan var det Askøy 1 som måtte reisa tomhendte heim, og i torsdag kveld var det Askøy-laget Follese sin tur.

Fitjar gjekk ut i stort tempo, og Øystein Waage var farleg frampå gong på gong. Det var derfor ikkje ufortent at Fitjar gjekk opp til 1-0 tidleg i kampen. Ufortent var det heller ikkje at det var nettopp Øystein som fekk gleda av å scora.

Utover i kampen hadde Fitjar eit lite overtak, og etter kvart gjekk dei opp til 2-0 ved Kjell André Thorland og 3-0 ved Mats Brakedal. Då det var att 10 minutt av kampen hadde dei fornøgde supporterane på tribunen innkassert sigeren. Kanskje og spelarane ute på banen, for brått sleppte dei inn 2 mål på kort tid. Dermed blei sluttminuttane VELDIG hektiske, i ein kamp som burde vore avgjort lenge før.

Men med heltemodig innsats reid Fitjar stormen av og kunne gå av banen med tre velfortente poeng. Å trekkja fram enkeltspelarar denne gongen er kanskje ikkje så lett. Heile laget kjempa godt, og gjorde den kjølige kvelden triveleg for den harde kjernen at supporterar.