I semifinalen mot Nest-Sotra blei det brått slutt for gutane til Fitjar.

Fleire hundre fotballinteresserte hadde møtt opp for å heia gutelaget til Fitjar fram til finale i KM Hordaland Fotballkrins. Og det så lenge ut til å gå rette vegen. Fitjar-gutane opna friskt, og den første halvtimen hadde dei det meste av spelet, og det vesle som var av målsjansar. Men mot slutten av første omgang begynte Nest-Sotra å eta seg inn i kampen. Det kjendest likevel blodig urettferdig for Fitjar, då gjestene gjekk opp til leiing 1-0 på overtid i første omgang. 

Med søndagens målrike kamp i friskt minne var det ingen grunn til å gi opp. Det viste seg likevel at dette ikkje var Fitjar-gutane sin dag. Utover i andre omgang jamna spelet seg ut. Nest-Sotra viste seg å vera godt organiserte defensivt, var flinke å vera på rett side av ballen, og vann fleire og fleire ballar utover i kampen. Dei var flinka å lyda ordren frå benken sin: «På rett side – og lås!» Det var akkkurat det dei gjorde, og det blei vanskeleg for Fitjar-gutane å komma til målsjansar.

Det var 11 skuffa gutar og like skuffa supporterar som måtte sjå kampen ebba ut med 0-1. Men gutane har iallfall fått vist at dei kan kjempa jamt med dei beste.