Dei andre opprykkskandidatane i 5. divisjon møtte kvarandre laurdag ettermiddag, og resultata ser gunstige ut for Fitjar.

Kor gunstige dagens resultat viser seg å vera, veit me ikkje heilt sikkert før me nærmar oss slutten av sesongen, men nett no ser det bra ut.

Trott reiste til Askøy i dag og tapte 1-3 for lag nummer to på tabellen, Vestsiden-Askøy. Dermed fekk Trott seg eit skot for baugen etter fleire flotte resultat i det siste. På Nyamyro tok Halsnøy imot ein annan opprykkskandidat, Løvstakken, og vann 4-2.

Dermed er Vestsiden-Askøy på andreplass på tabellen i 5. divisjon, berre tre poeng bak Fitjar, som leier puljen med 37 poeng. Mellom dei tre andre opprykkskandidatane er det svært jamt. 

Med siger heime mot Vadmyra 2 i morgon ettermiddag kan Fitjar få ei luke på ni poeng ned til lag nummer tre på tabellen, Løvstakken. Etter som to lag rykkjer opp til 4. divisjon, er dette vel så viktig som avstanden til lag nummer to.