Utflytta fitjarbu Aud Gloppen sin design av den nyskapande litteraturutgåva av Bibelen nådde heilt til topps i klassen for skjønnlitteratur under kåringa av «Årets vakreste bøker 2012».

«Dette er uten tvil en fantastisk produksjon! Den er en overbevisende utgivelse med et flott samspill mellom lesevennlig og gjennomført typografi, fantastisk innbinding, godt valg av papir, og en vár helhet i forhold til tema. Alle detaljer er nøye gjennomtenkt og utført» skriv juryen.

Litteraturutgåva av Bibelen presenterer dei bibelske bøkene som samanhengjande litterær tekst utan versenummer, fotnotar, kryssreferansar og anna tilleggsstoff.

Aud Gloppen som jobbar i Blæst design har og tidlegare hatt oppdrag for Bibelselskapet. I 2006 vann hun gull i same klasse for si formgjeving av Det nye testamentet.

Under utdelinga i Nasjonalbiblioteket torsdag vart ho vidare heidra med prisar i både sølv og gull for design av fleire bokprosjekt.
 – Me er svært glade på Aud Gloppen sine vegner. Dette er hennar dag, sa generalsekretær i Bibelselskapet, Ingeborg Mongstad‐Kvammen. Ho håpar at prisen kan bidra til at Bibelen får merksemd også i nye lesargrupper.