Store, fine fitjarpoteter på Goddo har trivest godt i sommer. Foto: Privat.

På Goddo finn me kanskje dei finaste fitjarpotetene i heile verda, og dei har hatt ein særs god sommer i tørken, får me opplyst i ei gladmelding frå Ole Sørvik.

For fem år sidan skreiv me om fitjarpotetene som Audhild og Ole Sørvik dyrkar på Goddo, i Bømlo kommune. Dette er dei mest ekte fitjarpotetene i heile verda, og dei er veldig fine.

Ole Sørvik ved potetåkeren sin på Goddo. Foto: FP-arkiv/KR.

Ekteparet har i mange år dyrka «kvite engelske» fitjarpoteter, og me ser ikkje vekk frå at den største av åkerlappane er den finaste fitjarpotetåkeren i verda.

Audhild Sørvik arva dei kvite fitjarpotetene etter far sin, Gerhard Myren (1922-2010). Dei som ho dyrkar i dag, stammar frå desse potetene til faren.

Det er ikkje dei heilt store mengdene ho dyrkar, men ein god sesong gir ei avling på vel 1000 kg. Den største åkeren er vel eit halvt mål, og i tillegg har ho fleire mindre åkerlappar rundt omkring.

Månadsskiftet august/september er vanleg innhaustingstid for Audhild og Ole Sørvik, og i desse dagar er dei i full gang med å spa opp årets avling. Og den er svært god; det ser ut til at potetene har tolt den sjeldne tørkesommaren godt.

Ingressbiletet av årets fitjarpoteter på Goddo talar sitt tydelege språk. I denne artikkelen frå 2013 på Fitjarposten kan du lesa meir om potetdyrkarane i nærleiken Austvikjo heilt nord på Goddo.

Slik kan ein ekte fitjarpotetåker sjå ut. Foto: FP-arkiv/KR.