-Me var nok både redde og skjelvne ei stund. No er me berre glade for at det gjekk så bra som det gjorde. Både med oss og båten. Det seier dei fem damene som vart frakta inn til Fitjar Fjordhotell etter at D/S "Oster", gjekk på grunn i ettermiddag.

– Først høyrde me fleire kraftige smell. Deretter rista båten kraftig og la seg over mot styrbord side. Det såg òg ut til at slagsida var aukande, og då me sjekka i maskinrommet, såg me at båten tok inn vatn. Det var skremmande, får me vite.

Men like etter kom ein båt tilfeldig forbi, og damene vart frakta inn til Fitjar Fjordhotell, medan resten av mannskapet var igjen på båten. For mannskap var dei alle 16 om bord på denne turen. Hadde delt inn i vakter. Nokre var av og nokre på. Eit par av damene låg faktisk og sov middag då grunnstøtinga skjedde.

Alle er dei med i Nordhordland Veteranbåtlag, og når Hovudredningsentralen vart kopla inn, ingen vart skadde – og dei seinare i kveld fekk vite at båten var stabilisert, kunne dei slappa av med godt påsmurt i pianobaren på hotellet.

Om jubileumsprogrammet vart avlyst, vonar dei likevel at den gamle dampen kan vere klar igjen til den planlagde hundreårsmarkeringa på Vågen i Bergen 28. juni.

-Men det veit me jo ikkje før ein veit kor store skadar båten har fått, understrekar dei, før dei legg til: -Få med at me vert svært godt tekne vare på her på hotellet!

D/S "Oster" vert ved 22-tida i kveld slept inn til slippen i Dåfjorden. Og Dåfjorden blir dermed første stopp for dei fem damene, i morgon.

Les meir om D/S Oster på www.oster.no