Under bilcrossløpet på Gol denne helga deltok tre mann frå Fitjar Racing Team, Håvard Dalen, Oliver André Matre og Jonas Koløen Lønning.

Goldagsløpet er ein hovudattraksjon under dei årlege Goldagane, og gjekk av stabelen laurdag og søndag. Dette er eit løp med svært god deltaking, og mange skarpskodde konkurrentar køyrer i mykje påkosta bilar som er noko dyrare enn det våre beste menn kan skilta med. Og dyktige førarar, mange med erfaring frå rallycross, etter det me forstår.

– Nivået var høgt – med gode førarar og mange dyre bilar, som sikkert kostar opp mot 40 000 kronar, seier Jonas til Fitjarposten.

Dei lokale heltane våre nådde opp denne gongen. Håvard Dalen sin Sierra fungerte bra, men på dei to andre blei det mange tekniske problem. Og ingen av Fitjar-førarane var i nærleiken av finale. Me må langt ned på resultatlista frå Goldagsløpet for å finna våre. Best blei Oliver A. Matre på ein 68.-plass, medan Jonas Lønning og Håvard Dalen så vidt kom inn blant dei 100 beste, nr. 97 og 100.

Jonas fortel at han nesten hadde motorhavari på treninga før løpet. Og under løpet i dag blei han grundig påkøyrd, så motoren stoppa. – Og du kan sei det slik at du ser det på bilen, seier Jonas. Også Oliver sleit med tekniske problem, men klarte to 3.-plassar i innleiande heat laurdag. I det andre løpet blei han «torpedert»  i andre sving, noko som førte til problem med falsk luft og punktering. Med redusert bil før søndagens rundar var det uråd for Olive å nå nokon finale i dag.

På veg opp på Hardangervidda søndag kveld slår Jonas likevel fast at dei har hatt ei flott helg på Gol. Litt regn natt til laurdag og laurdag føremiddag, men elles har dei hatt mykje fint vêr. Han melder og om god trivsel og god støtte både av mekanikarar og andre supporterar frå Fitjar under løpet på Gol. Mest hjelp i depotet fekk dei denne gongen av Martin Fausk og Kjetil Lønning, fortel Jonas.

Etter løpet var det heile 1790 bod på bilane. I bilcross er reglane slik at du kan missa bilen din på auksjon etter løpet. Det er ein måte å halda nede kostnadene på bilane i bilcross. Både Håvard Dalen og Jonas Lønning fekk bilane med seg heim. Men verre gjekk det med Oliver A. Matre, som miste bobla si under auksjonen etter løpet. Heldigvis har han fleire bobler på lager, og etter det me forstår, ser ikkje Oliver svart på å ha mist ei av boblene sine.

Neste start for Oliver blir landsfinalen i bilcross i august. For Jonas blir det nok òg fleire løp i år. Men først skal han heim og fiksa bil. Kor lang tid det vil ta, veit han ikkje enno.

Ingressbiletet: Oliver André Matre blir «torpedert» på Gol. Foto: Privat.