Eit ungt og urutinert Fitjar-lag viste lovande takter sjølv om det blei tap 1-2 for Solid i ein treningskamp tysdag kveld. Med tap 1-7 mot 3.-divisjonslaget Austevoll i bagasjen frå før helga, hadde Fitjar skrudd motstanden ned eit par hakk. Men også mot 5.-divisjonslaget Solid blei det tap.

Fitjar stilte med dette laget frå start: Idar Volden Mjønes, Kåre Olav Skram, Nils Ingar Tislevoll, Asbjørn Vik, André Helland, Vegar Helland, Lars Engelsen, Jan Åge Tislevoll, Leif Tore Aarland, Sondre Fykse Lie og Ronald Skaar. Etter kvart fekk me sjå desse innbytarane: Øyvind Solli Koløen, Thomas Vestbøstad Waage, Goff Helland og Ole Edin Kibsgård. Desse reservane kom ikkje innpå i kveld: Daniel Nesbø, Per Malvin A. Wichmann og Leif André Tangen.

Første omgang blei prega av lange ballar og lite etablert spel frå nokon av laga. Det var Fitjar som opna scoringane ved Lars Engelsen, før Håvard Haga utlikna for Solid. I andre omgang tok spelet seg opp. Ikkje minst viste Fitjar lovande takter med mykje fint pasningsspel. Heile laget jobba godt – det kan sjå ut som om dei er godt trente – og spelte seg til 3 heilt opne målsjansar. Berre uflaks og ein veldig god Andreas Westerheim i Solid-målet hindra scoring for Fitjar. Utover i 2. omgang gleid spelet betre og betre for det unge Fitjar-laget, og det var noko ufortent då storvaksne Håvard Haga avgjorde kampen for Solid berre eit par minutt før slutt.

Trass i kalddusjen sit me at med inntrykk av at Fitjar har eit lovande mannskap på gang. Fitjar-trenar Roy Inge Stegane var og rimeleg fornøgd med kampen. Det blir spennande å sjå om den positive tendensen frå 2. omgang i kveld held fram. På eit jamt Fitjar-lag likte me godt unge Leif Tore Aarland og målscorar Lars Engelsen. Men heile laget skal ha ros for god innsats.