Bjørg Strømme vil la deg få prøva måling i juni. Arkivfoto: Kjetil Rydland.

Skaparglede, inspirasjon og kunnskap er stikkorda for sykurset som er sett opp på Fitjar neste helg.

Av: Ingrid Hovstad

Bjørg Strømme er eit kjent namn for mange. Om du har møtt ho som faglærar i formgjeving, leiar i Hordaland Bygdekvinnelag eller sett noko av kunsten ho lagar. Alt frå akvarell måleri til kreasjonar i lakseskinn kan Strømme finna på å laga. No vil ho halda sykurs i Galleri Losjen på Fitjar fredag 1. til søndag 3. februar. Kurset vil passa for nybegynnarar, men ogso dei som har sydd litt før.

– Målet for kurset er å sy ein overdel, frå tanke til ferdig produkt. Dermed lærer ein heile prosessen med mønsterlaging, storleiksrekning og andre nødvendige steg i prosessen, fortel kurshaldar, Bjørg Strømme.

Nordmenn kastar i snitt 24 kilo klede i året, men me vert ogso stadig meir miljøbeviste. Dei siste åra har det blitt meir populært å kjøpa brukt, å fiksa det ein allereie har eller å sy heilt eigne plagg.

– Ein tek betre vare på det ein har laga sjølv, seier Strømme. Ho gler seg til ei sosial helg, der ein kan bli inspirert av kvarandre og prata om mote og design.

Hugs å ta med symaskin, stoff, tråd, knappenåler, målband og eventuelle knappar og tilbehøyr du ynskjer på overdelen din. Strømme tek med strykebrett og strykejarn som ein får låna utover i syprosessen. Ho tipsar om at det finst 3 sybutikkar i nabokommunen om ein skulle trenga noko utstyr eller eit flott stoff til kurset.

– Det er allereie nokre påmeldte til kurset, og rundt 8 deltakar er ideelt på plassen ein har til rådigheit, seier Strømme, som legg til at dette vert garantert ei kjekk helg.

Du melda deg på ved å senda mail til bjstroe@online.no eller ta kontakt over telefon på: 48135758, innan 30.januar.