Nydeleg ver gjorde skidagen komplett. Foto: Ingrid Hovstad

Øvrebygda vel inviterte store og små til ake- og skidag ved Øvrebygda skule.

Rundt 150 store og små tok turen innom i løpet av dagen, og arrangørane var svært nøgd med oppmøte. Dei hadde rigga opp bålpanner, der ein kunne grilla det ein ville. Velforeininga stilte med kaffi, kakao og saft.

-Me hadde planlagt litt lekar og slikt, men me ser at folk heller verdset eit fritt opplegg der dei kan ta seg ein pause ved bålpanna når dei sjølv ynskjer, fortel Unni Strand i Øvrebygda vel. Ho fekk like vel ivra opp nokre skigåarar til ein liten konkurranse.

Håkon Rydland Sæbø hadde laga løyper på bakkane ved Øvrebygda skule, ei kort og ei lang. Først ut var dei opp til 4.klasse. Ivrige stavtak vart tekne, og den korta løypa vart runda i ein fei. Først over målstreken var Thomas Sandvik, som etterpå uttale at løypa godt kunne vore lenger.

1. til 4. klassingane i full fart ut av startområde. Foto: Ingrid Hovstad

Ogso i klassen 5.klasse og oppover stakk ein gut av med sigeren, her var Adrian Vik den første gjennom den lange løypa.

I dei vaksne var det vanskelegare å vekka konkurranseinstinktet. Kristi Rydland, og ekteparet Nina Aarbø Olsen og Johannes Olsen var dei einaste som tok utfordringa. Kristi Rydland var raskast gjennom løypa, men det var nok Johannes på sine miniski som vekka mest merksemd i løypa.

F.v. Nina Aarbø Olsen, Johannes Olsen og Kristi Rydland. Foto: Ingrid Hovstad

Brørne Erik (11) og Lukas (7) var to av dei kosa seg på ake- og skidagen.

-Eg har både aka og stått på ski, fortel Lukas.

- Annonse -

-Eg har berre stått på ski, seier Erik.

Gutane har sett seg ned for ein pust i bakken, og ein matbit. Dei fortel at dei har vore mykje ute i snøen på skulen, og at dei hadde skidag med skulen på torsdag.

Erik og Lukas kosar seg på ski-og akedag. Foto: Ingrid Hovstad

Øvrebygda vel fortel at dei har planar for fleire arrangement ut over året.

-Me er ei levande bygd, og håpar folk stør opp om framtidige arrangement ogso, fortel Unni Strand.

Både store og små hadde det kjekt i akebakken. Foto: Ingrid Hovstad