Grunna litt nært opp til ferien og nokre utøvarforfall, var det ein liten, men innsatsviljug gjeng frå friidrettsgruppa som deltok på Stordleikane sist helg.

Som vanleg var det Tone Sandtorv Brakedal (11 år) som beit aller best frå seg. På 60 m synte ho imponerande fighter-eigenskapar då ho avgjorde ein svært jamn duell til sin fordel med 0,02 sekunds margin. 9,22 heldt til siger i klassen, som fylte tre heile heat. I lengde med tilløp synte ho igjen evne til iskald kalkulering då ho etter to døde hopp hadde kniven på strupen i forhold til å kome vidare til finalen og tre siste hopp. 4,05 m målte 3.-hoppet, ny personleg rekord, og ingen var i nærleiken av å kunne straffe denne lengda seinare i konkurransen. Ny siger til Tone.

Dagen etter, på søndag, toppa ho det heile med siger også i høgdesprang, med 1,32 m og klar ny personleg rekord. Resultatet gir nøyaktig 1000 poeng etter tyrvingtabellen (noko som statistisk gjer det rimeleg å anta at Tone er mellom Norges 5 beste høgdehopparar i sin klasse).

Også Ingrid Tveita viste at ho hadde brukt ferien fornuftig. Ein diskos og ei kule på heimlån i sommarmånadene resulterte i solid ny personleg rekord og 4.-plass blant 11 deltakarar i kulekonkurransen. Resultatet hennar, 6,12 m, er personleg rekord med halvannan meter. Ho deltok også i liten ball, men enda der noko lenger ned på resultatlista. Brørne Markus (10) og Ådne Kongestøl Vik (12) deltok i høvesvis liten ball og lengde med tilløp. Dei presterte begge opp mot personleg rekord, men kom ikkje til finalar i den harde konkurransen.