F.h. Nelly, Halvor og Abu bokbadar Audhild Solberg.

8B ved Rimbareid skule bokbada Audhild Solberg i dag.

Elevane med hjelp av lærarar og Fitjar folkebibliotek stod for hendinga, og klassen hadde saman laga mange gode spørsmål til forfattaren. Nelly, Halvor og Abu gjorde ein god jobb med å stilla spørsmåla, og Jørgen, Viljar og Eirik styra lyden med stålkontroll.

Audhild Solberg var komen for å snakka om den nye boka si «den svartkledde jenta». Boka er del av ein grøssarserie for ungdom, og er ein spøkelseshistorie. Likevel har boka viktig og relevant tema. I boka møter me 15 år gamle Hanna, som forelskar seg i den eldre guten Leo, som seinare utnyttar.

– Leo er ein drittsekk, konstanterte 8B, som alle har lese boka til Solberg.

Me lærte mykje nytt om forfattaren på dei 45 minutta. Ho elskar pizza, er mørkredd og har aldri vore i ei campingvogn.

– Eg vart forfattar fordi eg likar å skriva, og eg likar å fortelja historier. Året mitt kan delast i tre: skriving, TV-sjåing og boklesing for inspirasjon, og den siste er å reisa rundt å fortelja, som eg gjer no til dykk. Eg trivst som forfattar, men det kan vera einsamt til tider. Eg har ikkje kollegaer rundt meg, som i mange andre yrker, fortel Solberg.

Audhild Solberg rosa elevane for mange gode spørsmål, særleg relatert til den nye boka hennar.

- Annonse -

– Handlinga i boka er basert på ulike historier i frå folk eg kjenne. Eg er frå ein liten stad i Telemark, ikkje ulik Fitjar, og det er diverre ikkje ein utenkeleg situasjon at folk ligg saman før dei er klar for det, uttala Solberg.

Elevane lurte på kva Hanna burde ha gjort i situasjonen, og kva konsekvensane hadde vore for Leo.

– Hanna burde sagt nei og prøvd å kome seg unna Leo, sjølv om dette er vanskeleg. Leo hadde fått konsekvensar frå politiet sidan Hanna er mindreårig.

– Kva er ein god kjærast, spør elevane til slutt.

– Ein som du ikkje behøver å forandra deg for.